5ஆம் கட்டத் தேர்தல்: 49 தொகுதிகளில் வாக்குப்பதிவு தொடக்கம்

மக்களவை 5-ஆம் கட்டத் தோ்தலையொட்டி, உத்தர பிரதேசம் உள்பட 6 மாநிலங்கள் மற்றும் 2 யூனியன் பிரதேசங்களில் உள்ள 49 தொகுதிகளில் திங்கள்கிழமை (மே 20) காலை 7 மணிக்கு வாக்குப் பதிவு தொடங்கியது. வாக்குப் பதிவையொட்டி வாக்குச்சாவடிகளில் பலத்த பாதுகாப்பு ஏற்பாடுகள் செய்யப்பட்டுள்ளன.

அமேதி, ரேபரேலி, ஃபைசாபாத் உள்ளிட்ட அரசியல் முக்கியத்துவம் வாய்ந்த மக்களவைத் தொகுதிகளில் இத்தோ்தல் நடைபெறுகிறது. இதில் ஃபைசாபாத் மக்களவைத் தொகுதி, அயோத்தி நகரை உள்ளடக்கியதாகும்.

நாட்டில் 18-ஆவது மக்களவையைத் தோ்வு செய்ய ஏழு கட்டங்களாக (ஏப்ரல் 19, 26, மே 7, 13, 20, 25, ஜூன் 1) தோ்தல் நடைபெற்று வருகிறது. ஏற்கெனவே நான்கு கட்ட வாக்குப் பதிவுகள் நிறைவடைந்துள்ளன.

ஐந்தாம் கட்டமாக, உத்தர பிரதேசத்தில் 14, மகாராஷ்டிரத்தில் 13, மேற்கு வங்கத்தில் 7, பிகாா், ஒடிஸாவில் தலா 5, ஜாா்க்கண்டில் 3, ஜம்மு-காஷ்மீா் மற்றும் லடாக் யூனியன் பிரதேசங்களில் தலா ஒரு தொகுதிக்கு வரும் திங்கள்கிழமை தோ்தல் நடைபெறுகிறது. காலை 7 மணிக்கு தொடங்கி மாலை 6 மணி வரை வாக்குப் பதிவு நடைபெறவுள்ளது.

8.72 கோடி வாக்காளா்கள்: ஐந்தாம் கட்டத் தோ்தலில் மொத்த வாக்காளா்கள் 8.95 கோடி போ். இவா்களில் பெண்கள் 4.26 கோடி போ். இவா்கள் வாக்களிக்க வசதியாக 94,732 வாக்குப் பதிவு மையங்கள் அமைக்கப்பட்டுள்ளன. 9.47 லட்சம் ஊழியா்கள் தோ்தல் பணியில் ஈடுபடவுள்ளனா்.

முக்கிய வேட்பாளா்கள்: மத்திய அமைச்சா்கள் ராஜ்நாத் சிங் (லக்னெள), பியூஷ் கோயல் (மும்பை வடக்கு), ஸ்மிருதி இரானி (அமேதி), சாத்வி நிரஞ்சன் ஜோதி (ஃபதேபூா்), சாந்தனு தாக்கூா் (பங்கெளன்), காங்கிரஸ் எம்.பி. ராகுல் காந்தி (ரேபரேலி), லோக் ஜனசக்தி (ராம்விலாஸ்) கட்சித் தலைவா் சிராக் பாஸ்வான் (ஹாஜிபூா்), தேசிய மாநாட்டுக் கட்சி துணைத் தலைவா் ஒமா் அப்துல்லா (பாரமுல்லா), மகாராஷ்டிர முதல்வரும் சிவசேனை தலைவருமான ஏக்நாக் ஷிண்டேவின் மகன் ஸ்ரீகாந்த் ஷிண்டே (கல்யாண்), ஆா்ஜேடி தலைவா் லாலு பிரசாதின் மகள் ரோஹிணி ஆச்சாா்யா (சரண்) உள்ளிட்டோா் முக்கிய வேட்பாளா்களாவா்.

கடந்த தோ்தலில் இந்த 49 தொகுதிகளில் 40 தொகுதிகளுக்கும் மேல் பாஜக தலைமையிலான தேசிய ஜனநாயக கூட்டணி வெற்றி பெற்றிருந்தது.

35 பேரவைத் தொகுதிகளுக்கு...: ஒடிஸாவில் மக்களவைத் தோ்தலுடன் பேரவைக்கு நான்கு கட்டங்களாகத் தோ்தல் நடைபெற்று வருகிறது. இங்கு இரண்டாம் கட்டமாக 35 பேரவைத் தொகுதிகளுக்கு திங்கள்கிழமை வாக்குப் பதிவு நடைபெறுகிறது.

இதுவரை... மக்களவைக்கு இதுவரை நடைபெற்று முடிந்த நான்கு கட்டத் தோ்தல்களில் சராசரியாக 66.95 சதவீத வாக்குகள் பதிவாகியுள்ளன. மொத்தமுள்ள 543 தொகுதிகளில் இதுவரை 379 இடங்களுக்கு தோ்தல் நிறைவடைந்துள்ளது.

மக்களவைக்கான 6, 7-ஆம் கட்ட வாக்குப் பதிவுகள் மே 25, ஜூன் 1 ஆகிய தேதிகளில் நடைபெறவுள்ளன. ஜூன் 4-ஆம் தேதி வாக்குகள் எண்ணப்பட்டு, முடிவுகள் அறிவிக்கப்படவுள்ளன.