மதுபானக் கூடத்தில் பாடல் ஒலிபரப்புவதில் தகராறு: டிஜே சுட்டுக்கொலை!

ஜார்க்கண்ட் தலைநகர் ராஞ்சியில் செயல்பட்டு வரும் மதுபானக் கூடம் ஒன்றில் சந்தீப் என்ற இளைஞர் பாடல்களை ஒலிபரப்பும் ’டிஜே’ ஆக பணிபுரிந்து வந்துள்ளார்.

இந்த நிலையில், அந்த மதுபானக் கூடத்திற்கு ஞாயிற்றுக்கிழமை(மே 27) நள்ளிரவில் அப்பகுதியை சேர்ந்த 5 பேர் மது அருந்தச் சென்றுள்ளதாகக் கூறப்படுகிறது.

அப்போது போதை தலைகேறிய நிலையில், பாடல்களை ஒலிபரப்பிக் கொண்டிருந்த சந்தீப்பிடம் அவர்கள் தகராறு செய்ததாகக் கூறப்படுகிறது. தாங்கள் விரும்பிய பாடல்களை ஒலிபரப்ப வேண்டுமென்று சந்தீப்பை அவர்கள் கட்டாயப்படுத்தியுள்ளதாகவும், இதற்கு சந்தீப் மறுப்பு தெரிவித்துள்ளதாகக் கூறப்படுகிறது.

இது தொடர்பாக, சந்தீப்புக்கும் மது போதையில் இருந்த ஆசாமிகளுக்கும் இடையே வாக்குவாதம் ஏற்பட்டுள்ளது. இதையடுத்து அவர்களை மதுபானக்கூட ஊழியர்கள் சமாதானப்படுத்தி அனுப்பி வைத்துள்ளனர்.

இந்த நிலையில், அந்த கும்பலை சேர்ந்த அபிஷேக் சிங் என்பவர் நள்ளிரவு வேளையில் மீண்டும் மதுபானக் கூடத்திற்கு சென்றுள்ளார். உள்ளே புகுந்த அவர், தான் எடுத்துச் சென்றிருந்த நாட்டுத் துப்பாகியால் சந்தீப்பை சுட்டுக் கொன்றுவிட்டு தப்பியோடிவிட்டார்.

அரைநிர்வாணக் கோலத்தில் மதுபனக் கூடத்திற்கு வந்திருந்த அபிஷேக் சிங் தனது துப்பாக்கியால் சந்தீப்பின் மார்பில் குறிபார்த்துச் சுடும் காட்சிகள் அனைத்தும் அங்கிருந்த கண்காணிப்பு கேமராவில் பதிவாகியுள்ளன.திங்கள்கிழமை(மே 27) அதிகாலை 1 மணியளவில் இந்த சம்பவம் அரங்கேறியுள்ளது.

இதையடுத்து சம்பவ இடத்திலேயே சந்தீப் உயிரிழந்ததார். இந்த சம்பவம் தொடர்பாக வழக்குப்பதிந்து விசாரணை மேற்கொண்டு வந்த காவல்துறையினர், தப்பியோடிய நபரை தீவிரமாகத் தேடி வந்தனர்.

இந்த நிலையில், தப்பியோடிய நபர் பிகார் மாநிலம் கயாவில் இருப்பது விசாரணையில் தெரிய வந்தது. இதைத் தொடர்ந்து ராஞ்சி காவல்துறை கயாவில் இருந்த அபிஷேக் சிங்கை கைது செய்து விசாரணைக்காக ராஞ்சிக்கு அழைத்துச் சென்றிருப்பதாகவும், அவரிடம் கொலைக்கான காரணம் என்ன உள்ளிட்டவை குறித்து விசாரணை நடத்தப்பட்டு வருவதாகவும் தெரிவிக்கப்பட்டுள்ளது.