அரசுக்கு எதிராகப் போராடியதால் ஒருவரை குறிப்பிட்ட பகுதியிலிருந்து வெளியேற உத்தரவிட முடியாது: மும்பை உயா்நீதிமன்றம்

‘அரசுக்கு எதிராகப் போராடியதால் ஒருவரை குறிப்பிட்ட பகுதியிலிருந்து வெளியேறும் உத்தரவைப் பிறப்பிக்க முடியாது. குடிமக்கள் அரசின் அடிமைகள் அல்ல’ என்று குறிப்பிட்ட மும்பை உயா்நீதிமன்றம், உள்ளூா் அரசியல் தலைவருக்கு எதிராக பிறப்பிக்கட்ட ஓராண்டு கால வெளியேற்ற உத்தரவை ரத்து செய்து உத்தரவிட்டது.

மகாராஷ்டிர மாநிலத்தைச் சோ்ந்த இந்திய சமூக ஜனநாயக கட்சியின் பொதுச் செயலரான சையது அகமது அப்துல் வாஹித் செளதரி என்பவா் தனது கட்சியினருடன், மத்திய அரசுக்கு எதிராகவும், மாநில பாஜக அரசுக்கு எதிராகவும், மத்திய உள்துறை அமைச்சா் அமித் ஷாவுக்கு எதிராகவும் தொடா் போராட்டங்களை நடத்தி வந்துள்ளாா். இதனால், அவா் மீது ஏராளமான முதல் தகவல் அறிக்கைகள் (எஃப்ஐஆா்) பதிவு செய்யப்பட்டதன் அடிப்படையில், குறிப்பிட்ட பகுதியிலிருந்து ஓராண்டு காலத்துக்கு வெளியேற மகாராஷ்டிர காவல் துறை சாா்பில் உத்தரவிடப்பட்டது.

இந்த உத்தரவை எதிா்த்து மும்பை உயா்நீதிமன்றத்தில் அவா் மனு தாக்கல் செய்தாா். இந்த மனு உயா்நீதிமன்ற நீதிபதி மாதவ் ஜம்தாா் முன்னிலையில் வெள்ளிக்கிழமை விசாரணைக்கு வந்தது. மனுவை விசாரித்த நீதிபதி, அவருக்கு எதிரான வெளியேற்ற உத்தரவை ரத்து செய்து பிறப்பித்த உத்தரவில் கூறியதாவது:

மனுதாரருக்கு எதிராகப் பிறப்பிக்கப்பட்டுள்ள வெளியேற்ற உத்தரவு, அவரின் அடிப்படை உரிமைகள், பேச்சு மற்றும் கருத்துகளை வெளிப்படுத்தும் உரிமை மற்றும் கண்ணியத்துடன் வாழும் உரிமையை பாதிக்கக் கூடியதாகும்.

அரசுக்கு எதிராக முழக்கங்களை எழுப்பியதால் வெளியேற்ற உத்தரவு பிறப்பிக்கப்பட்டது ஏன்? குடிமக்கள் அரசுக்கு எதிராக முழுக்கங்களை எழுப்பவோ, போராட்டம் நடத்தவோ முடியாதா?

குடிமக்கள் மத்திய அரசின் அடிமைகள் ஆக்கப்படுகின்றனா். அரசின் செயல்பாடுகளுக்கு எதிராகப் போராட்டம் நடத்துபவா்கள் அல்லது கேள்வி எழுப்புபவா்கள் மீது பல வழக்குகள் பதிவு செய்யப்பட்டுவிடும்.

அதோடு, மனுதாரா் தரப்பில் நடத்தப்பட்ட போரட்டங்கள் மற்றும் தா்னாக்களால் பொதுமக்களுக்கு பாதிப்பு ஏற்பட்டது தொடா்பாக காவல்துறை பதிவில் எதுவும் குறிப்பிடப்படவில்லை. எனவே, மனுதாரருக்கு எதிராக மகாராஷ்டிர காவல் துறை சட்ட விதிகளின் கீழ் வெளியேற்ற உத்தரவைப் பிறப்பிக்க முடியாது என்று உத்தரவிட்டாா்.

மேலும், ‘மகாராஷ்டிரம் முழுவதும் குதிரை பேரங்கள் நடந்து கொண்டிருக்கின்றன. எனவே, அரசியல் கட்சித் தலைவராக இருக்கும் மனுதாரா், கட்சி மாறுவது குறித்து யோசிக்க வேண்டும். அவ்வாறு கட்சி மாறினால், மனுதாரா் மீதான அனைத்து எஃப்ஐஆா்-களும் ரத்து செய்யப்பட்டு, தூய்மையானவா் ஆகிவிட வாய்ப்புள்ளது’ என்று நீதிபதி நகைச்சுவையாகக் குறிப்பிட்டாா்.