அதிநவீன செயற்கைக்கோள் வெற்றிகரமாக நிலைநிறுத்தம்: புவி கண்காணிப்பில் மேலும் ஒரு மைல்கல்

புவி கண்காணிப்பு மற்றும் பேரிடா் மீட்புப் பணிகளுக்காக இந்திய விண்வெளி ஆய்வு நிறுவனம் (இஸ்ரோ) சாா்பில் ஜிஎஸ்எல்வி எஃப்-17 ராக்கெட் மூலம் வெள்ளிக்கிழமை விண்ணில் செலுத்தப்பட்ட அதிநவீன இஓஎஸ்-05 (ஜிஐசாட் 1-ஏ) செயற்கைக்கோள் திட்டமிட்டபடி புவிவட்ட சுற்றுப்பாதையில் வெற்றிகரமாக நிலைநிறுத்தப்பட்டது.

நம் நாட்டின் தொலையுணா்வு பயன்பாட்டுக்காக இஸ்ரோ சாா்பில் காா்டோசாட், ஸ்காட்சாட், ரிசாட் உள்பட பல்வேறு செயற்கைக்கோள்கள் விண்ணில் நிலைநிறுத்தப்பட்டு வருகின்றன. அந்த வரிசையில் புவி கண்காணிப்பு மற்றும் பேரிடா் மீட்புப் பணிகளுக்காக இஓஎஸ்-03 (ஜிஐசாட்) என்ற அதிநவீன ‘ஜியோ இமேஜிங்’ செயற்கைக்கோளை இஸ்ரோ தயாரித்தது. இது ஜிஎஸ்எல்வி எஃப்-10 ராக்கெட் மூலம் கடந்த 2021 ஆக.12-ஆம் தேதி விண்ணில் செலுத்தப்பட்டது. ஆனால், கிரையோஜெனிக் இயந்திரத்தில் ஏற்பட்ட தொழில்நுட்பக் கோளாறால் அந்தத் திட்டம் தோல்வியில் முடிந்தது.

இதையடுத்து, ஜிஐசாட் செயற்கைக்கோள் மீண்டும் உருவாக்கப்பட்டு விண்ணில் ஏவப்படும் என்று இஸ்ரோ அப்போது அறிவித்தது. அதன்படி வடிவமைக்கப்பட்ட அதிநவீன இஓஎஸ்-05 (ஜிஐசாட் 1-ஏ) செயற்கைக்கோளை, ஜிஎஸ்எல்வி எஃப்-17 ராக்கெட் மூலம் விண்ணில் செலுத்த இஸ்ரோ திட்டமிட்டது.

2,367 கிலோ எடை: இந்த ராக்கெட் ஏவுதலின் இறுதிக்கட்டப் பணிகளுக்கான 27.50 மணி நேர கவுன்ட்டவுன் கடந்த செப். 2-ஆம் தேதி இரவு 11.25 மணிக்கு தொடங்கியது. இதையடுத்து, ஆந்திர மாநிலம் ஸ்ரீஹரிகோட்டாவில் உள்ள சதீஷ் தவன் மையத்தின் 2-ஆவது ஏவுதளத்தில் இருந்து ஜிஎஸ்எல்வி எஃப்-17 ராக்கெட் வெள்ளிக்கிழமை அதிகாலை 2.55 மணிக்கு திட்டமிட்டபடி விண்ணில் செலுத்தப்பட்டது.

தரையில் இருந்து புறப்பட்ட இந்த ராக்கெட் சுமாா் 19 நிமிஷங்களில் திட்டமிட்ட புவிவட்ட சுற்றுப்பாதையில் இஓஎஸ்-05 செயற்கைக்கோளை வெற்றிகரமாக நிலைநிறுத்தியது. இஓஎஸ்-05 செயற்கைக்கோள் 2,367 கிலோ எடையுடையது. இதன் ஆயுள்காலம் 10 ஆண்டுகள். தற்போது குறைந்தபட்சம் 171 கி.மீ., அதிகபட்சம் 31,026 கி.மீ. கொண்ட சுற்றுப்பாதையில் வலம்வரும் செயற்கைக்கோள், அதிலுள்ள உந்துவிசை மோட்டாா்கள் மூலம் படிப்படியாக இறுதிக்கட்ட சுற்றுப்பாதைக்கு மாற்றப்படும்.

36,000 கி.மீ. தொலைவில்...இஸ்ரோவின் வரலாற்றில் முதல்முறையாக புவி கண்காணிப்புப் பணியை அடிப்படையாகக் கொண்ட செயற்கைக்கோள் ஒன்று தரையில் இருந்து 36,000 கி.மீ. தொலைவில் உள்ள புவிவட்டப்பாதையில் இருந்து ஆய்வுப் பணிகளை மேற்கொள்ள உள்ளது. கடந்த பிப்ரவரி நிலவரப்படி இந்தியாவிடம் 21 தொலையுணா்வு செயற்கைக்கோள்கள் செயல்பாட்டில் இருந்தன. அவை அனைத்தும் புவி தாழ்வட்டப்பாதை அல்லது சூரிய ஒத்திசைவு சுற்றுப்பாதையில் நிலைநிறுத்தப்பட்டன.

இஓஎஸ்-05 செயற்கைக்கோள் வானிலை, விவசாயம், மேகவெடிப்பு, கடல்சாா் கண்காணிப்பு, கனிமவள ஆராய்ச்சி உள்பட பல்வேறு தரவுகளை நிகழ்நேரத்தில் வழங்கும். குறிப்பாக, புவியின் ஒரு பகுதியை நிகழ்நேர தன்மையில் தினமும் 4 அல்லது 5 முறை படம்பிடிக்கும் திறன், நாட்டின் பாதுகாப்பு மேம்பாடு உள்பட பல்வேறு சிறப்பம்சங்கள் உள்ளன. இதிலுள்ள இரண்டுவிதமான 3டி கேமராக்களால் புவிப்பரப்பை 40 மீட்டா் வரை மிக துல்லியமாகப் படம் எடுக்க முடியும். வானிலை நிலவரங்களைத் தொடா்ந்து ஆராய்ந்து, புயல் உள்பட பேரிடா் காலங்களில் முன்னெச்சரிக்கை நடவடிக்கைகளை விரைவாக மேற்கொள்ள உதவும். மேலும், இந்தியாவின் எல்லைப் பகுதிகளை தொடா்ச்சியாகக் கண்காணித்து நாட்டின் பாதுகாப்பு அமைப்புகளுக்குத் தேவையான முக்கியத் தகவல்களை அளிக்கும்.

இதற்கிடையே, நிகழாண்டில் இதுவரை 2 ஏவுதல்களை மட்டுமே இஸ்ரோ நிகழ்த்தியுள்ளது. கடந்த ஜன.12-ஆம் தேதி விண்ணில் செலுத்தப்பட்ட இஓஎஸ் என்-1 செயற்கைக்கோள் தோல்வி அடைந்தது. சுமாா் 8 மாதங்களுக்குப் பிறகு பெரும் எதிா்பாா்ப்புகளுக்கு இடையே ஏவப்பட்ட ஜிஎஸ்எல்வி எஃப்-17 வெற்றி பெற்றுள்ளது. இது ஜிஎஸ்எல்வி வகையில் 19-ஆவது ராக்கெட்டாகும். இதில் 13 வெற்றியும், 6 தோல்வியும் கிடைத்துள்ளன என்பது குறிப்பிடத்தக்கது.

இஸ்ரோவுக்கு பிரதமா் மோடி பாராட்டு

ஜிஎஸ்எல்வி எஃப்-17 ராக்கெட்டின் வெற்றிக்கு பிரதமா் நரேந்திர மோடி பாராட்டு தெரிவித்துள்ளாா்.

இதுதொடா்பாக அவா் எக்ஸ் தளத்தில் வெளியிட்ட பதிவு: இஸ்ரோவின் மற்றொரு தலைசிறந்த சாதனை. நம்நாட்டுக்கு இதுவொரு பெருமையான தருணம். புவிவட்ட சுற்றுப்பாதையில் இருந்து செயல்படும் இந்தியாவின் முதல் இமேஜிங் செயற்கைக்கோளான இஓஎஸ்-05 வெற்றிகரமாக ஏவப்பட்டது இந்தியாவின் விண்வெளித் துறையை வரையறுக்கும் சிறப்பம்சம் மற்றும் வளா்ந்துவரும் திறன்களின் பிரதிபலிப்பாகும். இஸ்ரோவுக்கும், இந்திய தொழில் துறைக்கும் இடையே வளா்ந்துவரும் கூட்டாண்மையானது, நமது விண்வெளித் திட்டத்துக்கு புதிய வலிமையையும், பரிமாணத்தையும் சோ்ப்பதுடன், ஒட்டுமொத்த விண்வெளிச் சூழலமைப்பிலும் இந்தியாவின் திறன்களை விரிவுபடுத்துகிறது எனப் பதிவிட்டுள்ளாா்.

‘குலசேகரன்பட்டினம் ராக்கெட் ஏவுதளம்: பராமரிப்பு மட்டும் தனியாா் மூலம் மேற்கொள்ளப்படும்’

தூத்துக்குடி மாவட்டம், குலசேகரன்பட்டினத்தில் அமைக்கப்பட்டுவரும் ராக்கெட் ஏவுதளம் அரசு கட்டமைப்புதான் என்றும், அதன் பராமரிப்புப் பணி மட்டுமே தனியாா் மூலம் மேற்கொள்ளப்பட உள்ளது என்றும் இஸ்ரோ தலைவா் வி.நாராயணன் தெரிவித்துள்ளாா்.

ஜிஎஸ்எல்வி எஃப்-17 ராக்கெட் வெற்றிகரமாக ஏவப்பட்டதைத் தொடா்ந்து இஸ்ரோ தலைவா் வி.நாராயணன் ஸ்ரீஹரிகோட்டாவில் செய்தியாளா்களிடம் கூறியதாவது:

நம் நாட்டின் புவி கண்காணிப்பு, பேரிடா் மேலாண்மை உள்பட பல்வேறு பயன்பாடுகளுக்காக 36,000 கி.மீ. புவிவட்ட சுற்றுப்பாதையில் நிலைநிறுத்தப்படும் முதல் செயற்கைக்கோள் என்பதால் இந்தத் திட்டமானது சிறப்பு வாய்ந்ததாகும். ஜிஎஸ்எல்வி எஃப்-17 ராக்கெட், நாங்கள் எதிா்பாா்த்ததைவிட கூடுதல் திறனுடன் செயல்பட்டது. ஜிஎஸ்எல்வியில் ஆரம்பகால ஏவுதலில் 1,536 கிலோ வரை மட்டுமே செலுத்த முடிந்தது. ஆனால், தற்போது 2,367 கிலோ எடையைச் சுமந்து சென்று வரலாறு படைத்துள்ளது.

நிகழ் நிதியாண்டில் இன்னும் 6 விண்வெளித் திட்டங்களைச் செயல்படுத்தவுள்ளோம். தூத்துக்குடி மாவட்டம், குலசேகரன்பட்டினத்தில் அமைக்கப்பட்டுவரும் ராக்கெட் ஏவுதளம் அரசு கட்டமைப்புதான். ஆனால், அவற்றின் பராமரிப்பு தனியாா் மூலம் மேற்கொள்ளப்பட உள்ளது. அங்கு இஸ்ரோ மற்றும் தனியாா் ஊழியா்கள் இருப்பாா்கள். அங்கிருந்து இஸ்ரோ மற்றும் தனியாா் செயற்கைக்கோள்கள் செலுத்தப்படும்.

ககன்யான் திட்டம் அதிக தொழில்நுட்பச் செறிவு கொண்ட ஒன்றாகும். எனவே, ககன்யான் விண்கலம் மனிதா்கள் பயணிக்க உகந்தது என்ற சான்றளிப்பை நாம் உறுதிசெய்ய வேண்டும். இதுவரை சுமாா் 8,000 சோதனைகள் நிறைவடைந்துள்ளன. அடுத்தகட்டமாக, ஆளில்லா விண்கலத்தை ஏவும் திட்டத்தைச் செயல்படுத்த தயாராகி வருகிறோம். அதன் முடிவுகளை ஆய்வு செய்த பின்னரே மனிதா்கள் விண்ணுக்கு அனுப்பப்படுவாா்கள் என்றாா் அவா்.