எம்.கே. பாலன் என்ன ஆனார்?: முதல்வருடன் அதிமுக வாக்குவாதம்

சென்னை, ஜுன் 25: திமுகவைச் சேர்ந்த முன்னாள் எம்.எல்.ஏ.வான எம்.கே. பாலன் தொடர்பாக முதல்வர் கருணாநிதியுடன் அதிமுக உறுப்பினர்கள் வாக்குவாதத்தில் ஈடுபட்டனர். திண்டுக்கல் டாக்டர் பாஸ்கரன் கொலை சம்பந்தமாக சட்டப் பேரவையில் வியாழக்கிழமை கொண்டு வரப்பட்ட சிறப்பு கவன ஈர்ப்பு தீர்மானத்தின்போது இது குறித்து நடைபெற்ற விவாதம்: முதல்வர் கருணாநிதி: திமுகவைச் சேர்ந்த முன்னாள் எம்.எல்.ஏ.வான எம்.கே. பாலன் ஐந்தாறு ஆண்டுகளுக்கு முன்பு வாக்கிங் சென்றபோது காணாமல் போனார். அப்படியே தூக்கி ஒரு காரில் போட்டுக் கொண்டு போனார்கள். தேடித்தேடி பார்த்தோம். சி.பி.சி.ஐ.டி. விசாரணை வேண்டும் என்று அன்றைய ஆட்சியாளர்களைக் கேட்டோம். எம்.கே. பாலன் திடகாத்திரமானவர். நல்ல உயரமானவர். அவரைத் தூக்கிக் கொண்டு போனார்கள். இதுவரையில் எந்தத் தடயமும் கிடைக்கவில்லை. இப்படியும் இந்த நாட்டிலே மிகச்சாதுர்யமாக தவறு செய்கின்ற கொடியவர்கள் இருக்கிறார்கள். சேகர்பாபு (அதிமுக): முதல்வர் கருணாநிதி அவைக்கு தவறான தகவல்களைத் தந்துள்ளார். எம்.கே. பாலன் காணமால்போன வழக்கு அதிமுக ஆட்சியில் சி.பி.சி.ஐ.டி. விசாரணைக்கு மாற்றப்பட்டு குற்றவாளிகள் கண்டுபிடிக்கப்பட்டு தண்டனை அனுபவித்து வருகின்றனர். முதல்வர் கருணாநிதி: குற்றவாளிகள் கிடைத்தார்கள். தண்டனையும் கிடைத்திருக்கலாம். எம்.கே. பாலன் உடல் கிடைக்கவில்லை. சேகர்பாபு (அதிமுக): எம்.கே. பாலனின் உடல் வியாசர்பாடி இடுகாட்டில் எரிக்கப்பட்டது கண்டுபிடிக்கப்பட்டது என்றார்.