களக்காடு முண்டன்துறை காப்பகத்தில் 14 புலிகள்

களக்காடு முண்டன்துறை காப்பகத்தில் கடந்த 2012 ம் ஆண்டின் கணக்கெடுப்பின்படி 12 புலிகளும், 40 சிறுத்தைகளும் இருந்தது. தற்போது மேற்கொண்ட கணக்கெடுப்பில் கிடைத்த தகவலின்படி கடந்த ஆண்டை விட 2 புலிகளின் எண்ணிக்கை அதிகரிக்க வாய்ப்புள்ளதாக வனத்துறையினர் தெரிவித்தனர்.

களக்காடு முண்டன்துறை புலிகள் காப்பகத்தில் புலிகள், சிறுத்தை உள்ளிட்ட விலங்கினங்கள் கணக்கெடுக்கும் பணி டிச. 16 ம் தேதி தொடங்கியது. காப்பகத்தில் 45 பீட்டுகளுக்கு தலா 5 பேர் கொண்ட குழுக்களாக சென்று விலங்கினங்கள் கணக்கெடுக்கும் பணியில் ஈடுபட்டனர்.

வனவர், வனக்காப்பாளர், வேட்டைத் தடுப்புக் காவலர், தன்னார்வத் தொண்டர், விலங்கியல் பயிலும் கல்லூரி மாணவர் என 5 பேர் கொண்டு குழுவினர் தினசரி 5 கி.மீ சுற்றளழில் வனப்பகுதியில் நடந்து சென்று விலங்கினங்களின் கால்தடங்கள், எச்சம் ஆகியவற்றை பதிவு செய்தனர்.கணக்கெடுப்பில் திருநெல்வேலி இந்து கல்லூரி மாணவர்கள் 20 பேரும், பாளையங்கோட்டை சாராள் தக்கர் கல்லூரி மாணவிகள் 10 பேரும் பங்கேற்றனர். களப்பணியாளர்கள் 5 தினங்கள் வனப்பகுதிகளில் சேகரித்த தகவல்களை ஒருங்கிணைக்கும் பணியில் ஞாயிற்றுக்கிழமை ஈடுபட்டனர். திங்கள்கிழமை இப்பணி முடிவடைகிறது.

புலிகள் காப்பகத்தில் 2010 ஆம் ஆண்டுக்கு பிறகு புலிகளின் எண்ணிக்கை குறித்து அறிவிப்பு எதுவும் வெளியிடவில்லை. இதனிடையே கடந்த 2012 ம் ஆண்டு மேற்கொண்ட கணக்கெடுப்பில் 12 புலிகளும், 40 சிறுத்தைகளும் இருப்பது உறுதி செய்யப்பட்டு்ள்ளதாக வனத்துறை அதிகாரிகள் தெரிவித்தனர்.

புலிகள் கணக்கெடுப்பின்போது, முண்டன்துறை சரகத்தில் களப்பணியாளர்கள் புலி ஒன்றின் கால்தடத்தை கண்டறிந்து சேகரித்தனர். அங்கு பதிவு செய்யப்பட்ட கால்தடம், பதிவு செய்வதற்கு சற்று நேரத்திற்கு முன்புதான் அப்பகுதியை புலி கடந்திருப்பது தெரியவந்தது. தற்போது மேற்கொண்ட கணக்கெடுப்பில் சேகரிக்கப்பட்ட தகவல்களின்படி கடந்த ஆண்டை விட ஒன்று அல்லது 2 புலிகளின் எண்ணிக்கை  அதிகரிக்க வாய்ப்பிருப்பதாக வனத்துறையினர் தெரிவித்தனர்.