கும்மிடிப்பூண்டியில் பைக் விற்பனை கடையில் 4 லட்சம் கொள்ளை

கும்மிடிப்பூண்டி ஜி.என்.டி சாலையில் சாமிரெட்டிக் கண்டிகை பகுதியில் உள்ள ஹீரோ ஹோண்டா பைக் விற்பனை கடையில் வெள்ளிக்கிழமை அதிகாலை மர்மநபர்கள் கடையின் பின்பக்க கதவை உடைத்து கடைக்குள் நுழைந்து 4 லட்சம் ரூபாயை கொள்ளை அடித்து உள்ளனர்.

கும்மிடிப்பூண்டி பைபாஸ் பகுதியை சேர்ந்த பாலசுந்தரம் மகன் தட்சிணாமூர்த்தி(38). இவர் கும்மிடிப்பூண்டி ஜி.என்.டி சாலையில் சாமிரெட்டிக் கண்டிகை பகுதியில் ஹீரோ ஹோண்டா கடையை கடந்த ஒரு வருடமாக நிர்வாகித்து வருகின்றார்.இந்நிலையில் வியாழக்கிழமை இரவு இவர் கடையை மூடிவிட்டு வீட்டிற்கு சென்று வெள்ளிக்கிழமை காலை கடையை திறந்து பார்த்தபோது கடையின் பின்பக்க கதவு உடைக்கப்பட்டு இருப்பதையும், கடையில் இருந்த ரூபாய் 4 லட்சம் பணம் கொள்ளை அடிக்கப்பட்டதையும் அறிந்து அதிர்ந்தார்.

தொடர்ந்து இது குறித்து கும்மிடிப்பூண்டி காவல் நிலையத்திற்கு அவர் தகவல் அளித்ததை தொடர்ந்து கும்மிடிப்பூண்டி போலீஸார் சம்பவ இடத்திற்கு விரைந்தனர்.தொடர்ந்து கைரேகை நிபுணர்கள் சம்பவ இடத்திற்கு வரவழைக்கப்பட்டு சோதனை நடத்தினர்.இந்த சம்பவம் குறித்து கும்மிடிப்பூண்டி போலீஸார் விசாரணை நடத்தி வருகின்றனர்.