ஸ்ரீவில்லிபுத்தூரில் 8 அடி ஆழமுள்ள குழியில் விழுந்த பசு மீட்பு

விருதுநகர் மாவட்டம், ஸ்ரீவில்லிபுத்தூரில் மின்வாரியத்தினர் தோண்டிய குழியில் புதன்கிழமை விழுந்த பசுவை தீயணைப்புப் படையினர் மீட்டனர்.

ஸ்ரீவில்லிபுத்தூர், கிருஷ்ணன்கோவில் தெருவைச் சேர்ந்தவர் முருகன். இவர் பசு மாடுகள் வளர்த்து தொழில் செய்து வருகிறார். இந்நிலையில் வீட்டின் எதிரே மின் வாரியத்தினர் தோண்டிய 8 அடி ஆழமுள்ள குழி மூடப்படாமல் இருந்தது. இதில் இவரது பசு மாடு ஒன்று விழுந்துவிட்டது. சுமார் 2 மணி நேரம் அப் பகுதியில் உள்ளவர்களுடன் இணைந்து மாட்டை மீட்கும் முயற்சியில் முருகன் ஈடுபட்டார். ஆனால் மீட்க முடியவில்லை. இதனையடுத்து ஸ்ரீவில்லிபுத்தூர், தீயணைப்புத் துறையினருக்கு தகவல் தரப்பட்டு அவர்கள் வந்து கயிறு கட்டி பசு மாட்டை மீட்டனர்.