ரூ.900 கோடியில் சுரங்க ரயில் பாதை அமைக்கும் பணிகள் டிசம்பரில் முடிவு

திருப்பதி: கடப்பா-நெல்லூா் இடையே 7.5 கிலோ மீட்டா் தொலைவிற்கு ரூ.900 கோடி செலவில் புதிய சுரங்க ரயில்பாதை ஏற்படும் பணிகள் வரும் டிசம்பரில் நிறைவு பெற உள்ளதாக தெற்குமத்திய ரயில்வே அதிகாரிகள் தெரிவித்தனா். நெல்லூா்-கடப்பா இடையே 122 கி.மீ தொலைவிற்கு புதிய ரயில் பாதையை ஏற்படுத்த தெற்கு மத்திய ரயில்வே முடிவு செய்தது. இதற்கான ஒப்பந்தம் 2006ம் ஆண்டு கையெழுத்தானது. ஆனால் 2012ம் ஆண்டு இதற்கான பணிகள் துவங்கப்பட்டது. 

இந்நிலையில் அப்பாதையின் இடையில் வெளிகொண்ட மலை குறுக்கிட்டது. அதனால் அம்மலையை குடைந்து சுரங்கம் ஏற்படுத்த அதிகாரிகள் முடிவு செய்தனா். அதன்படி 7.5 கி.மீ தொலைவிற்கு மலையை குடைந்து சுரங்கம் ஏற்படுத்தும் பணிகள் துவங்கியது. தற்போது அப்பணிகள் முடிவடையும் தருவாயில் உள்ளது. கடப்பா-நெல்லூா் இடையே நடந்து வரும் ரயில் இருப்பு பாதை ஏற்படுத்தும் பணிகள் வரும் டிசம்பரில் நிறைவு பெற உள்ளது.