வால்பாறையில் அதிமுக வெற்றி

வால்பாறை சட்டமன்ற தொகுதியில் போட்டியிட்ட அதிமுக வேட்பாளர் அமுல் கந்தசாமி வெற்றி. முதல் வெற்றியை பதிவு செய்தது அதிமுக. 

தமிழக சட்டப்பேரவை தேர்தல் ஏப்ரல் 6-ஆம் தேதி நடைபெற்றது. அதிமுக, திமுக, மக்கள் நீதி மய்யம், அமமுக, நாம் தமிழர் உள்ளிட்ட கட்சிகள், தேர்தலில் போட்டியிட்டன. 

ஞாயிற்றுக்கிழமை காலை 8 மணி முதல் அதற்கான வாக்கு எண்ணிக்கை நடைபெற்று வருகிறது. தபால் வாக்குகள் எண்ணப்பட்டது முதலே தொடர்ந்து திமுக முன்னிலை வகித்து வருகிறது. தற்போது வரை திமுக கூட்டணி 152 தொகுதிகளில் முன்னிலையில் உள்ளது, அதிமுக கூட்டணி 80 தொகுதிகளில் முன்னிலை பெற்றுள்ளது. 

இந்நிலையில் கொங்கு மண்டலத்தில் அதிமுக மற்றும் அதன் கூட்டணி கட்சிகள் வலுவான நிலையில் உள்ளன. அந்த வகையில், வால்பாறை சட்டப்பேரவை தொகுதியில் அதிமுக சார்பில் போட்டியிட்ட அமுல் கந்தசாமி வெற்றி பெற்றுள்ளதாக அறிவிக்கப்பட்டுள்ளது.

இதனால் அதிமுக இந்த சட்டப்பேரவை தேர்தலில் தனது முதல் வெற்றிக் கணக்கை தொடங்கியுள்ளது. அதிமுக வேட்பாளர் அமுல் கந்தசாமி  66 ஆயிரத்து 480 வாக்குகள்  பெற்றுள்ளார். அவரை எதிர்த்து போட்டியிட்ட  இந்திய கம்யூனிஸ்டு கட்சி வேட்பாளர் ஆறுமுகம் 53 ஆயிரத்து 309 வாக்குகள் பெற்று தோல்வியடைந்துள்ளார். 

தனித்தொகுதியான வால்பாறையில் அதிமுக வேட்பாளர் அமுல் கந்தசாமியை எதிர்த்து திமுக கூட்டணி கட்சியான இந்திய கம்யூனிஸ்ட் கட்சியை சேர்ந்த ஆறுமுகம் போட்டியிட்டார். இந்நிலையில் ஆறுமுகத்தை காட்டிலும் அமுல் கந்தசாமி 13 ஆயிரத்து 171 வாக்குகள் வித்தியாசத்தில் வெற்றி பெற்றுள்ளார் என்பது குறிப்பிடதக்கது.