சுடச்சுட

    

    அமர் சித்ர கதா ப்ரியர்களுக்கு ஒரு சர்ப்ரைஸ்!

    By கார்த்திகா வாசுதேவன்  |   Published on : 24th April 2019 01:28 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    ack_live1

     

    ஆயகலைகள் 64 என்று அறிந்திருப்பீர்கள். கிருஷ்ணர் தன் அராஜக மாமன் கம்சனைக் கொல்வதற்காக பயிற்சி எடுத்துக் கொள்ள சந்தீபனி முனிவரைத் தேடிச் சென்றார். உடன் அண்ணன் பலராமனும் உண்டு. அங்கு அவர்கள் வெறும் அறுபத்தி நான்கே நாட்களில் 64 கலைகளையும் 14 விதமான அறிவியல் உட்பிரிவுகளையும் கற்றுத் தேர்ந்து திரும்பியதாக இந்து புராணங்கள் சொல்கின்றன. கிருஷ்ணர் கற்றுக் கொண்ட அந்த 64 கலைகளையும் ஒரே இடத்தில் கற்றுக் கொள்ளும் வாய்ப்பு நமது இன்றைய தலைமுறையினருக்குக் கிடைத்தால் எப்படி இருக்கும்?! ஆஹா, ஓஹோ அமேஸிங் என்று துள்ளிக் குதிக்கும் படியாகத்தான் இருக்கும். 

    அதற்கு முன் 64 கலைகள் என்னென்ன என்று பார்த்து விடுவோம்.

    1. எழுத்திலக்கணம் (அக்கரவிலக்கணம்)
    2. எழுத்தாற்றல் (லிகிதம்)
    3. கணிதவியல்
    4. மறைநூல்(மறைநூல்)
    5. தொன்மம் (புராணம்)
    6. இலக்கணவியல் (வியாகரணம்)
    7. நயநூல் (நீதி சாஸ்திரம்)
    8. கணியம் (ஜோதிட சாஸ்திரம்)
    9. அறநூல் (தரும சாஸ்திரம்)
    10. ஓகநூல் (யோக சாஸ்திரம்)
    11. மந்திர நூல் (மந்திர சாஸ்திரம்)
    12. நிமித்திக நூல் (சகுன சாஸ்திரம்)
    13. கம்மிய நூல் (சிற்ப சாஸ்திரம்)
    14. மருத்துவ நூல் ( வைத்ய சாஸ்திரம்)
    15. உறுப்பமைவு நூல் ( உருவ சாஸ்திரம்)
    16. மறவனப்பு (இதிகாசம்)
    17. வனப்பு
    18. அணிநூல் (அலங்காரம்)
    19. மதுரமொழிவு (மதுர பாடணம்)
    20. நாடகம்
    21. நடம்
    22. ஒலிநுட்ப அறிவு (சத்தப் பிரமம்)
    23. யாழ் (வீணை)
    24. குழல்
    25. மதங்கம் (மிருதங்கம்)
    26. தாளம்
    27. விற்பயிற்சி (அஸ்திர வித்தை)
    28. பொன் நோட்டம் (கனக பரீட்சை)
    29. தேர்ப்பயிற்சி (ரத பரீட்சை)
    30. யானையேற்றம் (கஜ பரீட்சை)
    31. குதிரையேற்றம் ( அஸ்வ பரீட்சை)
    32. மணிநோட்டம் (ரத்ன பரீட்சை)
    33. மண்ணியல் அல்லது நிலநூல் (பூமி பரீட்சை)
    34. போர்ப்பயிற்சி (சங்கிராமவிலக்கணம்)
    35. மல்லம் (மல்யுத்தம்)
    36. கவர்ச்சி (ஆகருடணம்)
    37. ஓட்டுகை (உச்சாடணம்
    38. நட்புப் பிரிப்பு (வித்துவேடணம்)
    39. காமநூல் (மதன சாஸ்திரம்)
    40. மயக்குநூல் (மோகனம்)
    41. வசியம் (வசீகரணம்)
    42. இதளியம் (ரசவாதம்)
    43. இன்னிசைப் பயிற்சி (காந்தர்வ வாதம்)
    44. பிறவுயிர் மொழியறிகை (பைபீல வாதம்)
    45. மகிழுறுத்தம் (கவுத்திக வாதம்)
    46. நாடிப்பயிற்சி (தாது வாதம்)
    47. கலுழம் (காருடம்)
    48. இழப்பறிகை (நட்டம்)
    49. மறைத்ததையறிதல் (முஷ்டி)
    50. வான்புகவு (ஆகாயப் பிரவேசம்)
    51. வான்செலவு (ஆகாய கமனம்)
    52. கூடு விட்டுக் கூடு பாய்தல் (பரகாயப் பிரவேசம்)
    53. தன்னுருக் கரத்தல் (அதிருசியம்)
    54. மாயச்செய்கை (இந்திரஜாலம்)
    55. பெருமாயச் செய்கை (மகேந்திரஜாலம்)
    56. அழற்கட்டு (அக்னித் தம்பனம்)
    57. நீர்க்கட்டு (ஜலத்தம்பனம்)
    58. வளிக்கட்டு (வாயுத்தம்பனம்)
    59. கண்கட்டு (திருஷ்டித்தம்பனம்)
    60. நாவுக்கட்டு (வாக்குத்தம்பனம்)
    61. விந்துக்கட்டு (சுக்கிலத்தம்பனம்)
    62. புதையற்கட்டு (கனனத்தம்பனம்)
    63. வாட்கட்டு (கட்கத்தம்பனம்)
    64. சூனியம் (அவத்தைப் பிரயோகம்)

    சரி இவற்றையெல்லாம் ஒரே இடத்தில் யார் கற்றுத் தருகிறார்கள்? என்ற கேள்வி வருமே?!

    ‘அமர்சித்ரகதா’ நிறுவனத்தார் தான். ACK ALive (Amar Chitra Katha Alive) என்ற பெயரில் நடிகர் ராணா டகுபதி, அமர் சித்ர கதாவின் CEO அனுராக் அகர்வால், விதிஷா பாக்ரி மூவரும் இணைந்து ஸ்தாபித்துள்ளனர்.

    எங்கே என்றால்? 

    தற்போது முதற்கட்டமாக ஹைதராபாத் ராமாநாயுடு ஸ்டுடியோ வளாகத்தில் இருக்கும் மூன்று மாடிக் கட்டடம் ஒன்றில் மட்டுமே துவக்கப்பட்டுள்ள ACK Alive கூடிய விரைவில் இந்தியா முழுவதும் தனது கிளைகளைப் பரப்ப உள்ளதாம்.

    அதெல்லாம் சரி தான். ஆனால், இவர்களால் மேலே குறிப்பிடப்பட்டுள்ள ஆய கலைகள் 64 ஐயும் கற்றுத்தர முடியுமா? முதலில் இவை அத்தனையையும் கற்றுத்தர பொருத்தமான ஆசிரியர்கள் தற்காலத்தில் இருக்கிறார்களா? என்பது சிந்திக்க வேண்டிய விஷயம். இந்த அனாவசியக் கேள்விகளை புறம் தள்ளி விட்டால் ACK Alive அருமையான முயற்சி.

    கற்பனை செய்து பாருங்கள். நாம் சிறு வயதில் புத்தகத்தை எடுத்த கை விடாமல் அப்படி விழுந்து விழுந்து படுத்துக் களிப்போமே சுப்பாண்டியின் சாகஷங்கள், துப்பறியும் சாம்பு, வேட்டைக்காரன் வேம்பு, காளி தி க்ரோ, பட்டி விக்ரமாதித்தன், கிருஷ்ண பலராமன், உஷை அனிருத்தன் போன்ற அருமையான ஃபேண்டஸி கதாபாத்திரங்கள் அனைத்தும் புகைப்படங்களாகவும், சிற்பங்களாகவும், பொம்மைகளாகவும் நம்மைச் சுற்றி உலவ அவர்களுக்கு நடுவே அவர்கள் அமர்சித்ர கதைகளில் வெளிப்படுத்திய ஆயகலைகளையும் நாம் கற்கும் அனுபவம் எப்படிப் பட்டதாக இருக்கும் என்பதை! நிச்சயம் அது ஒரு அற்புதமான அனுபவமாகவே இருக்கும். 

    ACK Alive  வகுப்புகளில் சிறுவர், சிறுமிகள் மட்டும் தான் கலந்து கொள்ள வேண்டும் என்பதில்லை. கார்ப்பரேட் பணியில் அலுப்பும், சலிப்பும் மிக்கவர்கள், தினமும் ஒரே வேலையைச் செய்து செத்து சுண்ணாம்பாகிக் கொண்டிருக்கிறோமே என்று சலிப்புத் தட்டியவர்கள், வயதானாலும் சுறுசுறுப்பாக புதியவற்றைக் கற்றுக் கொள்ளும் ஆர்வம் கொண்வர்கள் என யார் வேண்டுமானாலும் இந்த வகுப்புகளில் தங்களை என்ரோல் செய்து கொண்டு பயிலத் தொடங்கலாம். டிப்ளமோ வகுப்புகளும் உண்டு என்கிறார்கள்.

    ஹைதராபாத்தில் இருக்கும் தமிழர்கள் அல்லது தமிழ் அறிந்தவர்கள் எவரேனும் ஆர்வமிருப்பவர்கள் இந்த பயிற்சி வகுப்புகளுக்குச் சென்று விட்டு உங்கள் அனுபவங்களை எங்களுக்கு எழுதுங்களேன்.

    அமர்சித்ரா கதா ரசிகர்களுக்கு இது நிஜமாகவே சர்ப்ரைஸ் தான் இல்லையா?!

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai