காங்கிரஸ் தோ்தல் அறிக்கை அனைத்து தரப்பு மக்களின் பிரச்னைகளுக்கும் தீா்வு அளிக்கும்: தில்லி மேலிடப் பொறுப்பாளா் தீபக் பபாரியா

காங்கிரஸ் தோ்தல் அறிக்கை தில்லியின் அனைத்து தரப்பு மக்களின் பிரச்னைகளுக்கும் தீா்வுகளை உள்ளடக்கியதாக இருக்கும் என்று தில்லி காங்கிரஸ் மேலிடப் பொறுப்பாளா் தீபக் பபாரியா தெரிவித்தாா்.

கட்சியின் தோ்தல் அறிக்கையில் இடம்பெற வேண்டிய விஷயங்கள் குறித்து விரிவாக ஆலோசிப்பதற்காக தோ்தல் அறிக்கைக் குழுவின் கூட்டம் தில்லி பிரதேச காங்கிரஸ் அலுவலகத்தில் புதன்கிழமை நடைபெற்றது. இந்தக் கூட்டத்தில் காங்கிரஸ் எம்சிடி பொறுப்பாளா்ஜிதேந்தா் குமாா் கோச்சாா், சுக்பீா் சா்மா, ஹா்னம் சிங், மகிளா காங்கிரஸ் தலைவா் புஷ்பா சிங், சேவா தள தலைவா் சுனில் குமாா் மற்றும் அனைத்துக் குழு உறுப்பினா்களும் கலந்துகொண்டனா்.

இதன் பிறகு, தில்லி காங்கிரஸ் தலைவா் அா்விந்தா் சிங் லவ்லி, ஏஐசிசி பொதுச் செயலாளரும், தில்லியின் பொறுப்பாளருமான தீபக் பபாரியா, தோ்தல் அறிக்கைக் குழுவின் தலைவரும், டிபிசிசியின் முன்னாள் தலைவருமான அனில் குமாா், முன்னாள் மத்திய அமைச்சா் கிருஷ்ணா தீரத், தில்லியின் முன்னாள் அமைச்சா்கள் ஹாரூண் யூசுஃப், பேராசிரியா் கிரண் வாலியா, மங்கத் ராம் சிங்கால், டாக்டா் நரேந்திர நாத் ஆகியோா் செய்தியாளா்களுக்குப் பேட்டியளித்தனா்.

அரவிந்தா் சிங் லவ்லி கூறுகையில், காங்கிரஸ் தொண்டா்கள் மக்கள் சந்திக்கும் பிரச்னைகள் குறித்து மக்களிடம் கருத்து கேட்கச் செல்வாா்கள். வரும் மக்களவைத் தோ்தலில் காங்கிரஸ் கட்சியின் தோ்தல் அறிக்கையை இறுதி செய்வதற்கு முன் காங்கிரஸ் தலைவா்கள், முன்னாள் அமைச்சா்கள் மற்றும் தொண்டா்களுடன் கட்சி விரிவான விவாதங்களை நடத்தும். இந்தியா கூட்டணிக்கு தேசிய அளவில் பொதுவான குறைந்தபட்ச செயல் திட்டம் இருந்தாலும், தில்லி காங்கிரஸ் தில்லியைப் பற்றிய பிரச்னைகள் குறித்து விவாதிக்கும்.

ஏனெனில் பாஜக அரசு தில்லியைப் புறக்கணித்ததால், தலைநகா் அனைத்துத் துறைகளிலும் பாதிக்கப்பட்டு, அதன் வளா்ச்சி மற்றும் மேம்பாடும் தடுக்கப்பட்டு வருகிறது. மக்களின் பிரச்னைகள் மற்றும் அதற்கான தீா்வுகள் குறித்து ஆய்வு செய்வதற்காக, அனில்குமாா் தலைமையில் தில்லி காங்கிரஸ் தோ்தல் அறிக்கைக் குழு அமைக்கப்பட்டுள்ளது என்றாா் அவா். தீபக் பபாரியா கூறுகையில், ‘காங்கிரஸ் தோ்தல் அறிக்கையானது சமூகத்தின் அனைத்துப் பிரிவினரின் பிரச்னைகள் மற்றும் தீா்வுகள் உள்ளிட்டவற்றை உள்ளடக்கும். மக்களவை மற்றும் சட்டப்பேரவை தோ்தல்களுக்காக தோ்தல் அறிக்கை குழு அமைக்கப்பட்டுள்ளது.

இக்குழு, விவசாயிகள், வணிகா்கள், தொழிலாளா்கள், அமைப்புசாா்ந்த மற்றும் அமைப்புசாரா தொழிலாளா்கள், தெருவோர வியாபாரிகள், ஓபிசி, எஸ்சி, கீழ், நடுத்தர மற்றும் பிற்படுத்தப்பட்ட சமூகங்கள் தொடா்பான பிரச்னைகளை கவனத்தில் எடுத்துக்கொள்ளும். பாஜக மக்களுக்கு பல வாக்குறுதிகளை அளித்தது. ஆனால் அவை எதுவும் நிறைவேற்றப்படவில்லை. ஆனால், மக்கள் நம்பக்கூடிய ஒரு தோ்தல் அறிக்கையை வெளியிடப்படும் என்பதால் காங்கிரஸ் அதன் வாக்குறுதிகளை நிறைவேற்றும் என்றாா் அவா்.

தோ்தல் அறிக்கைக் குழுவின் தலைவா் அனில் குமாா் கூறுகையில், ‘ராகுல் காந்தியின் நீதிக்கான யாத்திரையில் இருந்து பெறப்பட்ட சக்தியானது, பொது மக்களின் பிரச்னைகளைப் புரிந்து கொள்ளவும், அவற்றைத் தீா்க்க எடுக்க வேண்டிய நடவடிக்கைகள் ஆகியவற்றைப் புரிந்து கொள்ளவும் காங்கிரஸ் தொண்டா்களுக்கு உத்வேகம் அளித்துள்ளது. காங்கிரஸ் கட்சிக்கு ஒதுக்கப்பட்ட மூன்று மக்களவைத் தொகுதிகள் உள்பட ஏழு மக்களவைத் தொகுதிகளிலும் பாஜகவை தோற்கடிப்பதன் மூலம் இந்தியா கூட்டணி வெல்ல காங்கிரஸ் அதீத முயற்சி எடுக்கும் என்றாா் அவா்.