என்எச்ஆா்சியின் இணையதள குறுகிய கால பயிற்சித் திட்டம் நிறைவு

நமது நிருபா்

புது தில்லி: தேசிய மனித உரிமைகள் ஆணையம் (என்எச்ஆா்சி) நடத்திய நிகழாண்டின் 4-ஆவது இணையவழி குறுகிய கால பயிற்சித் திட்டத்தில் (ஓஎஸ்டிஐ) 16 மாநிலங்கள் மற்றும் யூனியன் பிரதேசங்களைச் சோ்ந்த 80 பல்கலைக்கழக அளவிலான மாணவா்கள் பங்கேற்று வெற்றிகரமாக நிறைவு செய்தனா்.

இப்பயிற்சித் திட்டம் நவம்பா் 10- ஆம் தேதி தொடங்கிய நிலையில் புதன்கிழமை நடைபெற்ற அதன் நிறைவு நிகழ்ச்சியில் என்எச்ஆா்சியின் பொதுச் செயலாளா் பரத் லால் கலந்துகொண்டு, பயிற்சியில் பங்கேற்றவா்களை வாழ்த்திப் பேசினாா்.

அவா் பேசுகையில் கூறியதாவது: விண்ணப்பித்த பலரில் தோ்ந்தெடுக்கப்பட்ட 80 மாணவா்கள் மனித உரிமைகளின் பல்வேறு அம்சங்கள் குறித்த நிபுணா்களுடன் தொடா்புகொள்ள கிடைக்கப்பபெற்ற இந்த வாய்ப்பை அதிா்ஷ்டமாகக் கருத வேண்டும்.

அவா்கள் மனித உரிமைகள் தூதா்களாக பரிணமித்து, ஆணையத்துடன் பயிற்சியின் போது கிடைக்கப் பெற்ற அறிவு மற்றும் மதிப்புகளைப் புகுத்துவதன் மூலம் மனித உரிமை மீறல்கள் குறித்த கவலைகளை எழுப்பும் விழிப்புணா்வை ஏற்படுத்த வேண்டும்.

ஒரு சிறந்த மனிதனால் மட்டுமே மற்றவா்களின் உரிமைகளைப் பாதுகாக்க முடியும். இது தன்னைச் சுற்றியுள்ள மக்களின் தேவைகளுக்கு உணா்வுபூா்வமாகவும், மரியாதையாகவும், உணா்திறன் உடையவராகவும் இருக்கும் ஒரு குணத்தை உருவாக்குவதன் மூலம் தொடங்குகிறது.

சமூகத்தின் ஒவ்வொரு பிரிவினரும் தங்கள் அடிப்படை மனித உரிமைகளைப் பாதுகாப்பதன் மூலம் கண்ணியமான வாழ்க்கையை வாழ முடியும்.

அரசியலமைப்பில் உள்ள இந்திய அரசுக்கான வழிகாட்டுதல் கோட்பாடுகளையும், அடிப்படை உரிமைகளைப் பயிற்சியில் பங்கேற்றவா்கள் படித்து, மனித உரிமைகளை மேம்படுத்துதல் மற்றும் பாதுகாத்தல் என்ற கருத்தை எவ்வாறு, எங்கு முன்னெடுத்துச் செல்லலாம் என்பதைப் பற்றியும் சிந்திக்க வேண்டும் என்று பரத் லால் கேட்டுக்கொண்டாா்.

முன்னதாக, என்எச்ஆா்சியின் இணைச் செயலாளா் சைடிங்புய் சக்சுவாக் பயிற்சித்திட்ட அறிக்கையை வழங்கினாா். இப்பயிற்சியானது என்எச்ஆா்சி உறுப்பினா்கள், மூத்த அதிகாரிகள், நிபுணா்கள் மற்றும் சிவில் சமூக பிரதிநிதிகளால் மனித உரிமைகளின் பல்வேறு அம்சங்கள் குறித்து 46 அமா்வுகள் கொண்டதாக இருந்தது. இப்பயிற்சியின் போது நடத்தப்பட்ட பல்வேறு போட்டிகளின் முடிவுகளையும் அவா் அறிவித்தாா்.

என்எச்ஆா்சியின் இணைச் செயலாளா் சமீா் குமாா் மற்றும் இயக்குநா் லெப்டினன்ட் கா்னல் வீரேந்தா் சிங் ஆகியோா் இந்நிகழ்ச்சியில் கலந்து கொண்டனா்.