பழனி மலைக் கோயில் உண்டியல் திறப்பு: காணிக்கை வரவு ரூ.3.66 கோடி

பழனி தண்டாயுதபாணி சுவாமி கோயில் உண்டியல்கள் 28 நாள்களில் நிறைந்ததையடுத்து, அவை புதன் மற்றும் வியாழக்கிழமைகளில் திறக்கப்பட்டு எண்ணப்பட்டதில் ரூ.3.66 கோடி காணிக்கையாகக் கிடைத்துள்ளது. 
கோடை விடுமுறையை முன்னிட்டு பழனி கோயிலுக்கு பக்தர்கள் அதிக அளவில் வந்திருந்தனர். இதனால், கோயில் உண்டியல்கள் 28 நாள்களில் நிரம்பின. அதையடுத்து, புதன் மற்றும் வியாழக்கிழமைகளில் உண்டியல்கள் திறக்கப்பட்டு, காணிக்கைகள் எண்ணப்பட்டன. 
இரண்டு நாள் எண்ணிக்கை முடிவில், ரூ.3 கோடியே 66 லட்சத்து 91 ஆயிரத்து 739 கிடைத்துள்ளது. மேலும், பக்தர்கள் உண்டியல்களில் தங்கத்தாலான வேல், தாலி, மோதிரம், சங்கிலி, தங்கக்காசு உள்ளிட்டவற்றையும், வெள்ளியாலான வீடு, தொட்டில், வேல், கொலுசு, பாதம் உள்ளிட்டவற்றையும் செலுத்தியுள்ளனர். இதில், தங்கம் 1,330 கிராமும், வெள்ளி 15,520 கிராமும் கிடைத்துள்ளன.
தொடர்ந்து, மலேசியா, சிங்கப்பூர், அமெரிக்கா, ஜப்பான், ஆஸ்திரேலியா, மியான்மர் உள்ளிட்ட பல்வேறு நாடுகளின் கரன்சிகள் 552 கிடைத்துள்ளன. 
உண்டியல் எண்ணும் பணியில் 500-க்கும் மேற்பட்டோர் ஈடுபட்டனர். இதில், பழனி கோயில் இணை ஆணையர் செல்வராஜ், துணை ஆணையர் (பொறுப்பு) செந்தில்குமார், மதுரை இந்துசமய அறநிலையத் துறை உதவி ஆணையர் சிவலிங்கம், கண்காணிப்பாளர் முரளி, மேலாளர் உமா உள்ளிட்ட பலர் பங்கேற்றனர்.