தேசிய ஹாக்கி: சர்வீசஸிடம் பணிந்தது கோவா

தேசிய சீனியர் ஹாக்கிப் போட்டியில் சர்வீசஸ் அணி 28-0 என்ற கோல் கணக்கில் கோவாவை வீழ்த்தி வெற்றியோடு தொடங்கியுள்ளது.

புணேவில் நடைபெற்று வரும் இப்போட்டியில் சனிக்கிழமை நடைபெற்ற ஆட்டத்தில் கோவாவை எதிர்கொண்டது சர்வீசஸ் அணி. தொடக்கம் முதலே ஆதிக்கம் செலுத்திய சர்வீசஸ் அணி, ஆட்டத்தின் 7-வது நிமிடத்தில் முதல் கோலை அடித்தது.

அதன்பிறகு தொடர்ச்சியாக கோலடித்த அந்த அணி, கடைசி நிமிடத்துக்கு முன்பு வரை கோல் மழையை பொழிந்தது.

அதேநேரத்தில் கடைசி வரை கோவா அணியால் ஒரு கோல்கூட அடிக்க முடியவில்லை. இதனால் சர்வீசஸ் 28-0 என்ற கோல் கணக்கில் அபார வெற்றி கண்டது. அந்த அணியில் அன்வர் 8 கோல்களையும், சிராஜூ 6 கோல்களையும் அடித்தனர்.

சாய் அணி வெற்றி: மற்றொரு ஆட்டத்தில் இந்திய விளையாட்டு ஆணைய (சாய்) அணி 9-0 என்ற கோல் கணக்கில் பிகாரை தோற்கடித்தது. நம்தாரி லெவன் அணி தொடர்ந்து 3-வது வெற்றியைப் பதிவு செய்துள்ளது.

சனிக்கிழமை நடைபெற்ற ஆட்டத்தில் அந்த அணி 8-2 என்ற கோல் கணக்கில் சஷத்ரா சீமா பால் அணியை தோற்கடித்தது.

சத்தீஸ்கர் அணி 7-3 என்ற கோல் கணக்கில் திரிபுராவையும், அசாம் அணி 10-0 என்ற கோல் கணக்கில் ராஜஸ்தானையும் தோற்கடித்தன.