3-வது சுற்றில் வோஸ்னியாக்கி தோல்வி

அமெரிக்க ஓபன் டென்னிஸ் போட்டியின் 3-ம் சுற்றில் டென்மார்க்கின் வோஸ்னியாக்கி, செக் குடியரசின் பெட்ரோ க்விட்டோவா ஆகிய வீராங்கனைகள் தோல்வியைத் தழுவினர்.

அதேசமயம், சுவிட்சர்லாந்தின் ஃபெடரர், ஸ்பெயினின் ரஃபேல் நடால் மற்றும் டேவிட் ஃபெரர், கனடாவின் மில்ஸ் ரயோனிக் உள்ளிட்ட முன்னணி வீரர்கள் 3-வது சுற்றில் வாகை சூடி அடுத்த சுற்றுக்கு முன்னேறினர்.

இப்போட்டியின் 6-ம் நாள் ஆட்டம் சனிக்கிழமை நடைபெற்றது. இதில் மகளிர் பிரிவுப் போட்டியின் 3-வது சுற்று ஆட்டத்தில் போட்டித் தரவரிசையில் 6-ம் இடத்தில் உள்ள வோஸ்னியாக்கியும், இத்தாலியின் கேமிலா ஜியோர்ஜியும் மோதினர். இந்த ஆட்டத்தில் 4-6, 6-4, 6-3 என்ற செட் கணக்கில் தோல்வியைத் தழுவி சோகத்துடன் வெளியேறினார் வோஸ்னியாக்கி.

அதேபோல், போட்டித் தரவரிசையில் 7-ம் இடத்தில் உள்ள க்விட்டோவா 3-6, 0-6 என்ற நேர் செட்களில் அமெரிக்காவின் அலிசன் ரிஸ்கியிடம் வீழ்ந்தார். மற்றொரு ஆட்டத்தில் ரஷியாவின் குஸ்னெட்சோவா 5-7, 1-6 என்ற நேர் செட்களில் இத்தாலியின் பெனட்டாவிடம் தோல்வியைத் தழுவினார்.

மற்ற ஆட்டங்களில் முன்னணி வீராங்கனைகளான செர்பியாவின் அனா இவானோவிச், ருமேனியாவின் சிமோனா ஹலேப், பெலாரஸின் விக்டோரியா அசரென்கா உள்ளிட்ட வீராங்கனைகள் அடுத்த சுற்றுக்கு முன்னேறினர்.

நடால், ஃபெடரர் வெற்றி: ஆடவர் ஒற்றையர் பிரிவு 3-வது சுற்று ஆட்டத்தில் நடால் 6-4, 6-3, 6-3 என்ற நேர் செட்களில் குரோஷியாவின் இவான் டோடிஜை தோற்கடித்தார். பிரான்ஸின் மன்னரினோவுக்கு எதிரான ஆட்டத்தில் 6-3, 6-0, 6-2 என்ற நேர் செட்களில் ஃபெடரர் வெற்றி பெற்றார். மற்றொரு ஆட்டத்தில் ஸ்பெயினின் டேவிட் ஃபெரர் 6-4, 6-3, 4-6, 6-4 என்ற செட்களில் கஜகஸ்தானின் ககுஷிகினை வீழ்த்தினார்.

போட்டித் தரவரிசையில் 13-வது இடத்தில் உள்ள அமெரிக்காவின் ஜான்

இஸ்னெர் 4-6, 6-3, 5-7, 6-7 என்ற செட் கணக்கில் ஜெர்மனியின் கோல்ஷீரபெரிடம் தோற்றார்.

3-வது சுற்றில் இந்திய வீரர்கள்: அமெரிக்க ஓபன் டென்னிஸ் போட்டியின் இரட்டையர் பிரிவிலான 2-வது சுற்று ஆட்டம் இந்திய வீரர்களுக்கு நன்றாக அமைந்தது.

சனிக்கிழமை நடைபெற்ற இரட்டையர் பிரிவு ஆட்டத்தில் லியாண்டர் பயஸ், துவிஜ் சரண் மற்றும் ரோகன் போபண்ணா ஆகிய ஜோடிகள், 2-வது சுற்று ஆட்டத்தில் வெற்றி பெற்று அடுத்த சுற்றுக்கு முன்னேறினர். மகளிர் இரட்டையர் பிரிவில் கலந்து கொண்ட சானியா மிர்சாவும் அடுத்த சுற்றுக்கு முன்னேறினார்.

சனிக்கிழமை நடைபெற்ற 2-வது சுற்று ஆட்டத்தில் பயஸ்-ஸ்டீபனெக் ஜோடி 4-6, 6-3, 6-4 என்ற செட் கணக்கில் ஜெர்மனியின் டேனியல் பிராண்ட்ஸ்-ஆஸ்திரியாவின் ஃபிலிப் ஆஸ்வால்ட் ஜோடியை வீழ்த்தியது.

இந்த ஆட்டம் 2 மணி நேரம் 35 நிமிடங்கள் நடைபெற்றது. இந்த ஜோடி, தங்களது காலிறுதிக்கு முந்தைய சுற்றில் பிரான்ஸின் மைக்கேல் லோட்ரா-நிகோலஸ் மாஹட் ஜோடியை எதிர்கொள்கிறது.

மற்றொரு ஆட்டத்தில் போட்டித் தரவரிசையில் 6-வது இடத்தில் உள்ள போபண்ணா-பிரான்ஸின் ரோஜர் வேஸ்ஸலின் ஜோடி 7-6, 7-6 என்ற நேர் செட்களில் ரஷியாவின் நிகோலய் டவிடென்கோ-மிகலி எல்ஜின் ஜோடியை தோற்கடித்தது.

தனது 2-வது கிராண்ட்ஸ்லாம் போட்டியான அமெரிக்க ஓபனில் சீன தைபேவின் யென்-சன் லூவுடன் இணைந்து விளையாடி வருகிறார் இந்தியாவின் துவிஜ் சரண். இந்த ஜோடி 2-வது சுற்றில் 6-4, 5-7, 7-6 என்ற செட்களில் இஸ்ரேலிய ஜோடியை வீழ்த்தி 3-வது சுற்றுக்குள் நுழைந்தது.

சானியா வெற்றி: மகளிர் இரட்டையர் பிரிவு ஆட்டத்தில் சானியா மிர்ஸா-சீனாவின் ஜி ùஸங் ஜோடி 6-3, 7-5 என்ற நேர் செட்களில் அமெரிக்காவின் மரோஸி-மெüல்டன் லேவி ஜோடியை தோற்கடித்தது.