ஐபிஎல் போட்டியில் ஹாட்ரிக் எடுத்த பந்துவீச்சாளர்கள்: முழுப்பட்டியல்!

நேற்று நடைபெற்ற ஐபிஎல் ஆட்டத்தில் தில்லி அணியை 14 ரன்கள் வித்தியாசத்தில் வென்றது பஞ்சாப் அணி. பஞ்சாப் வேகப்பந்துவீச்சாளர் சாம் கரண் அபாரமாக பந்துவீசி ஹாட்ரிக்குடன் 4 விக்கெட்டுகளை வீழ்த்தினார். முதலில் ஆடிய பஞ்சாப் 166/9 ரன்களை குவித்த நிலையில், பின்னர் ஆடிய தில்லி அணி 152 ரன்களை மட்டுமே எடுத்து ஆல் அவுட்டானது.

இந்த வருட ஐபிஎல் போட்டியில் ஹாட்ரிக் எடுத்த முதல் வீரர் என்கிற பெருமையைப் பெற்றுள்ளார் சாம் கரண். கடந்த வருட ஐபிஎல்-லில் எந்தவொரு பந்துவீச்சாளரும் ஹாட்ரிக் எடுக்கவில்லை. இந்நிலையில் இரு வருடங்கள் கழித்து ஐபிஎல்-லில் ஒரு பந்துவீச்சாளர் ஹாட்ரிக் எடுத்துள்ளார்.

மேலும் 20 வருடம் 302 நாளில் ஹாட்ரிக் எடுத்து ஐபிஎல் போட்டியில் இளம் வயதில் ஹாட்ரிக் எடுத்த வீரர் என்கிற பெருமையைப் பெற்றுள்ளார் சாம் கரண். இதற்கு முன்பு, 2009-ல் ரோஹித் சர்மா 22 வருடம் 6 நாளில் ஹாட்ரிக் எடுத்து சாதனை செய்தார். அதை சாம் கரண் முறியடித்துள்ளார். 

ஐபிஎல் ஏலத்தில் ரூ. 7.20 கோடிக்கு சாம் கரணை பஞ்சாப் அணி தேர்வு செய்தது. 

ஐபிஎல் போட்டியில் ஹாட்ரிக் எடுத்த வீரர்களின் பட்டியல்

2008 - பாலாஜி, மிஸ்ரா, எண்டினி
2009 - யுவ்ராஜ், ரோஹித் சர்மா, யுவ்ராஜ்
2010 - பிரவீன் குமார்
2011 - மிஸ்ரா
2012 - சண்டிலா
2013 - நரைன், மிஸ்ரா
2014 - டாம்பே, வாட்சன்
2016 - அக்‌ஷர் படேல்
2017 - பட்ரீ, டை, உனாட்கட்
2019 - சாம் கரண்