ரஸல் 5 விக்கெட்டுகள்: 152 ரன்களுக்கு மும்பை ஆட்டமிழப்பு

கொல்கத்தா நைட் ரைடர்ஸுக்கு எதிரான ஆட்டத்தில் முதலில் பேட் செய்த மும்பை இந்தியன்ஸ் நிர்ணயிக்கப்பட்ட 20 ஓவர்களில் 152 ரன்களுக்கு ஆட்டமிழந்தது.

14-வது ஐபிஎல் சீசனின் இன்றைய (செவ்வாய்க்கிழமை) ஆட்டத்தில் கொல்கத்தா நைட் ரைடர்ஸ், மும்பை இந்தியன்ஸ் அணிகள் விளையாடி வருகின்றன. டாஸ் வென்ற கொல்கத்தா கேப்டன் இயான் மார்கன் முதலில் மும்பையை பேட்டிங் செய்ய அழைத்தார்.

பவர் பிளே:

மும்பை தொடக்க ஆட்டக்காரர்களாக கேப்டன் ரோஹித் சர்மா மற்றும் குயின்டன் டி காக் களமிறங்கினர். டி காக் 2-வது ஓவரிலேயே வருண் சக்ரவர்த்தி சுழலில் 2 ரன்களுக்கு ஆட்டமிழந்தார். இதையடுத்து, ரோஹித்துடன் சூர்யகுமார் யாதவ் இணைந்தார்.

ஆடுகளத் தன்மையை அறிந்த மார்கன் பவர் பிளேவின் முதல் 5 ஓவர்களுக்கு சுழற்பந்துவீச்சாளர்களையே பயன்படுத்தினார். ஹர்பஜன் வீசிய 3-வது ஓவரில் மட்டும் சூர்யகுமார் 3 பவுண்டரிகள் அடித்ததால் ரன் ரேட் சற்று உயர்ந்தது.

பவர் பிளே முடிவில் மும்பை அணி 1 விக்கெட் இழப்புக்கு 42 ரன்கள் எடுத்தது.

ரோஹித் - சூர்யகுமார் இணை:

பவர் பிளேவுக்குப் பிறகு சூர்யகுமார் சற்று அதிரடி காட்டி இன்னிங்ஸில் ஆதிக்கம் செலுத்தத் தொடங்கினார். இதனால் ரன் ரேட் ஓவருக்கு 8-ஐத் தாண்டியது. 

பேட் கம்மின்ஸ் பந்தில் சிக்ஸர் அடித்த சூர்யகுமார் 33-வது பந்தில் அரைசதத்தை எட்டினார்.

ஆனால், அரைசதம் அடித்த கையோடு அடுத்த ஓவரிலேயே ஷகிப் அல் ஹசனிடம் 56 ரன்களுக்கு ஆட்டமிழந்தார்.

இந்த இணை 2-வது விக்கெட்டுக்கு 76 ரன்கள் சேர்த்தது. 

அடுத்த ஓவரிலேயே இஷான் கிஷன் 1 ரன்னுக்கு ஆட்டமிழந்தார்.

இதனால், ரன் ரேட்டில் சரிவு ஏற்பட்டது. இதுவரை தாக்குப்பிடித்து விளையாடிய ரோஹித் கடைசி வரை விளையாடி பெரிய இன்னிங்ஸாக மாற்றத் தவறினார். கம்மின்ஸ் பந்தில் 43 ரன்களுக்கு போல்டானார்.

11 ரன்களுக்கு 4 விக்கெட்டுகள்:

பிரசித் கிருஷ்ணா வீசிய அடுத்த ஓவரில் ஹார்திக் பாண்டியா 15 ரன்களுக்கு ஆட்டமிழந்தார். ஆண்ட்ரே ரஸல் வீசிய அடுத்த ஓவரில் கைரன் பொலார்ட் 5 ரன்களுக்கு ஆட்டமிழந்தார். அதே ஓவரில் மார்கோ ஜேன்சன் ரன் ஏதும் எடுக்காமல் ஆட்டமிழந்தார்.

3 ஓவர்களில் 11 ரன்கள் மட்டுமே எடுத்த நிலையில் 4 விக்கெட்டுகளை இழந்தது மும்பை.

ஆனால் கிருனாள் பாண்டியாவால் 19-வது ஓவரில் 2 பவுண்டரிகள் (லெக் பைஸ் உள்பட), கடைசி ஓவரின் முதல் 2 பந்துகளில் 2 பவுண்டரிகள் கிடைத்ததால் மும்பை அணி 150 ரன்களை எட்டியது. அவரும் கடைசி ஓவரின் 3-வது பந்தில் ரஸலிடம் 15 ரன்களுக்கு வீழ்ந்தார். ரஸல் மேலும் அடுத்த பந்தில் ஜாஸ்பிரீத் பூம்ராவையும், கடைசி பந்தில் ராகுல் சஹாரையம் வீழ்த்தினார்.

இதன்மூலம், மும்பை இந்தியன்ஸ் நிர்ணயிக்கப்பட்ட 20 ஓவர்களில் 152 ரன்களுக்கு ஆட்டமிழந்தது.

கொல்கத்தா தரப்பில் ஆண்ட்ரே ரஸல் 5 விக்கெட்டுகளையும், பேட் கம்மின்ஸ் 2 விக்கெட்டுகளையும், பிரசித், ஷகிப், வருண் ஆகியோர் தலா 1 விக்கெட்டையும் வீழ்த்தினர்.