வனிந்து ஹசரங்காவுக்குப் பதிலாக மாற்று வீரரை சன் ரைசர்ஸ் ஹைதராபாத் அணி நிர்வாகம் அறிவித்துள்ளது.
காயம் காரணமாக நடப்பு ஐபிஎல் தொடரிலிருந்து சன் ரைசர்ஸ் ஹைதராபாத் அணியின் நட்சத்திர சுழற்பந்துவீச்சாளரான வனிந்து ஹசரங்கா விலகுவதாக அண்மையில் அறிவித்தார். இந்த நிலையில், அவருக்குப் பதிலாக மாற்று வீரராக இளம் லெக் ஸ்பின்னரான விஜயகாந்த் வியாஸ்காந்தை சன் ரைசர்ஸ் ஹைதராபாத் அணி நிர்வாகம் அறிவித்துள்ளது. விஜயகாந்த் வியாஸ்காந்த் ரூ. 50 லட்சத்துக்கு சன் ரைசர்ஸ் அணியால் ஒப்பந்தம் செய்யப்பட்டுள்ளார்.
இது தொடர்பாக ஐபிஎல் தரப்பில் வெளியிட்டுள்ள அறிக்கையில் தெரிவித்திருப்பதாவது: நடப்பு ஐபிஎல் தொடரின் மீதமுள்ள போட்டிகளில் காயம் காரணமாக விலகிய வனிந்து ஹசரங்காவுக்குப் பதிலாக விஜயகாந்த் வியாஸ்காந்த் சன் ரைசர்ஸ் ஹைதராபாத் அணியால் ஒப்பந்தம் செய்யப்பட்டுள்ளார் எனத் தெரிவிக்கப்பட்டுள்ளது.
22 வயதாகும் விஜயகாந்த் வியாஸ்காந்த் இலங்கை அணிக்காக ஒரு டி20 போட்டியில் மட்டுமே விளையாடியுள்ளது குறிப்பிடத்தக்கது.
