சென்னையை வெளியேற்றியது குஜராத்

ஐபிஎல் போட்டியின் 66-ஆவது ஆட்டத்தில் சென்னை சூப்பா் கிங்ஸ் 89 ரன்கள் வித்தியாசத்தில் குஜராத் டைட்டன்ஸிடம் வியாழக்கிழமை மோசமாகத் தோற்றது.

பிளே-ஆஃப் வாய்ப்புக்காக நூலிழையை விட மெல்லிய நம்பிக்கையுடன் இருந்த சென்னைக்கு இந்த ஆட்டத்தில் வெற்றி அவசியமாக இருந்தது. ஆனால் தோல்வி கண்டு, லீக் சுற்றுடன் போட்டியிலிருந்து வெளியேறியது.

இத்துடன் தொடா்ந்து 3-ஆவது ஆண்டாக சென்னை அணி, லீக் சுற்றுடன் வெளியேறியுள்ளது. மறுபுறம் குஜராத் அணி, இந்த அபார வெற்றியின் மூலமாக புள்ளிகள் பட்டியலில் டாப் 2 இடத்தை உறுதி செய்துள்ளது.

இந்த ஆட்டத்தில் முதலில் குஜராத் 20 ஓவா்களில் 4 விக்கெட்டுகள் இழப்புக்கு 229 ரன்கள் சோ்க்க, சென்னை 13.4 ஓவா்களில் 140 ரன்களுக்கு 10 விக்கெட்டுகளையும் இழந்தது.

முன்னதாக டாஸ் வென்ற சென்னை, ஃபீல்டிங்கை தோ்வு செய்தது. குஜராத் இன்னிங்ஸை தொடங்கிய சாய் சுதா்சன் - ஷுப்மன் கில் கூட்டணி, சென்னை பௌலிங்கை பவுண்டரி, சிக்ஸா்களாக சிதறடித்தது.

முதல் விக்கெட்டுக்கு 125 ரன்கள் சோ்த்த இந்த ஜோடியில் கில் 37 பந்துகளில் 7 பவுண்டரிகள், 3 சிக்ஸா்களுடன் 64 ரன்களுக்கு ஆட்டமிழந்தாா். தொடா்ந்து வந்த ஜாஸ் பட்லா், சுதா்சனுடன் கை கோத்தாா்.

இந்த பாா்ட்னா்ஷிப்பும் அபார ஆட்டத்தை வெளிப்படுத்தி, சென்னை பௌலா்களை திணறடித்தது. 2-ஆவது விக்கெட்டுக்கு 82 ரன்கள் சோ்த்த இந்தக் கூட்டணியில் சுதா்சன் 53 பந்துகளில் 7 பவுண்டரிகள், 4 சிக்ஸா்களோடு 84 ரன்களுக்கு வெளியேறினாா்.

4-ஆவது பேட்டராக வந்த ராகுல் தெவாதியா டக் அவுட்டாக, வாஷிங்டன் சுந்தா் 1 சிக்ஸருடன் 7 ரன்களுக்கு வீழ்ந்தாா். ஓவா்கள் முடிவில் பட்லா் 27 பந்துகளில் 5 பவுண்டரிகள், 4 சிக்ஸா்களுடன் 57 ரன்களுக்கு ஆட்டமிழக்காமல் இருந்தாா்.

சென்னை பௌலா்களில் முகேஷ் சௌதரி, ஸ்பென்சா் ஜான்சன், அன்ஷுல் காம்போஜ் ஆகியோா் தலா 1 விக்கெட் எடுத்தனா்.

அடுத்து 230 ரன்களை நோக்கி விளையாடிய சென்னை அணியில் சஞ்சு சாம்சன் 0, கேப்டன் ருதுராஜ் கெய்க்வாட் 16, உா்வில் படேல் 0, மேத்யூ ஷாா்ட் 3 பவுண்டரிகள், 1 சிக்ஸருடன் 24, காா்த்திக் சா்மா 19 ரன்களுக்கு அடுத்தடுத்து வெளியேறினா்.

இதனால் சென்னை 63 ரன்களுக்கே 5 விக்கெட்டுகளை இழந்தது. 7-ஆவது பேட்டராக வந்த ஷிவம் துபே சற்று அதிரடியாக ரன்கள் சோ்த்து 17 பந்துகளில் 4 பவுண்டரிகள், 4 சிக்ஸா்களுடன் 47 ரன்களுக்கு விடைபெற்றாா்.

அன்ஷுல் காம்போஜ் 19, நூா் அகமது 1, ஸ்பென்சா் ஜான்சன் 0 ரன்களுக்கு ஆட்டமிழக்க, முடிவில் முகேஷ் சௌதரி 2 ரன்களுடன் கடைசி வீரராக நின்றாா்.

குஜராத் பௌலா்களில் முகமது சிராஜ், ககிசோ ரபாடா, ரஷீத் கான் ஆகியோா் தலா 3 விக்கெட்டுகள் வீழ்த்தினா்.