ஆசியா கோப்பை ஹாக்கி: அக்டோபர் 15 அன்று இந்தியா - பாகிஸ்தான் மோதல்!

வங்கதேசம் டாக்காவில் அக்டோபர் 11 முதல் 22 வரை ஆசியா கோப்பை ஹாக்கி போட்டி நடைபெறவுள்ளது. இந்தப் போட்டியை வெல்லும் அணி அடுத்த வருடம் இந்தியாவின் ஒடிஷாவில் நடைபெறவுள்ள உலகக் கோப்பைப் போட்டிக்கு நேரடியாகத் தகுதி பெறும். 

குரூப் ஏ பிரிவில் இந்தியா, பாகிஸ்தான், ஜப்பான், வங்கதேசம் ஆகிய அணிகள் உள்ளன. இப்போட்டியில் 8 நாடுகள் பங்கேற்கின்றன. 

2013-ல் நடைபெற்ற ஆசியா கோப்பைப் போட்டியை தென் கொரியா வென்றது. இந்தப் போட்டித் தரவரிசையில் இந்திய அணி முதலிடம் பிடித்துள்ளது. உலகளவிலான தரவரிசையில் 6-ம் இடம் உள்ள இந்திய அணி இந்தப் போட்டியை 2003, 2007 ஆகிய ஆண்டுகளில் வெற்றி பெற்றது. 

அக்டோபர் 11 அன்று நடைபெறுகிற போட்டியில் ஜப்பானை எதிர்கொள்கிறது இந்திய அணி. அக்டோபர் 15 அன்று இந்தியா - பாகிஸ்தான் அணிகள் மோதவுள்ளன.