ஐசிசி தரவரிசை: 5-வது இடத்துக்கு முன்னேறினார் ரோஹித் சர்மா!

ஐசிசியின் ஒருநாள் கிரிக்கெட் தரவரிசையில் பேட்ஸ்மேன்களுக்கான பட்டியலில் இந்திய வீரர் ரோஹித் சர்மா 5-வது இடத்துக்கு முன்னேறியுள்ளார்.

2016 பிப்ரவரி-யில் மூன்றாம் இடம் பிடித்த ரோஹித் சர்மா, தற்போது முதல்முறையாக 800 புள்ளிகள் பெற்றுள்ளார். இலங்கைக்கு எதிரான 2-வது ஒருநாள் போட்டியில் மூன்றாவது இரட்டைச் சதமெடுத்த ரோஹித்  சர்மா, தற்போது 825 புள்ளிகளுடன் 5-வது இடத்துக்கு முன்னேறியுள்ளார். 

ஒருநாள் தொடரில் தொடர் நாயகன் விருது பெற்ற ஷிகர் தவன், 14-வது இடத்துக்கு முன்னேறியுள்ளார். 

ஒருநாள் கிரிக்கெட் தரவரிசையில் பேட்ஸ்மேன்களுக்கான பட்டியலில் 876 புள்ளிகளுடன் இந்திய கேப்டன் விராட் கோலி முதலிடம் வகிக்கிறார். டி வில்லியர்ஸ், டேவிட் வார்னர், பாபர் அசாம், ரோஹித் சர்மா ஆகியோர் டாப் 5 பட்டியலில் இடம்பிடித்துள்ளார்கள்.

பந்துவீச்சாளர்களுக்கான பட்டியலில் பாகிஸ்தானின் ஹசன் அலி முதலிடத்தில் உள்ளார். அடுத்த நான்கு இடங்களில் இம்ரான் தஹிர், ஜஸ்ப்ரித் பூம்ரா, ஜோஸ் ஹேஸில்வுட், ரபாடா ஆகியோர் உள்ளார்கள்.

இலங்கை அணியை இந்தியா 3-0 என ஒருநாள் தொடரில் தோற்கடித்திருந்தால் அணிகளுக்கான தரவரிசைப் பட்டியலில் முதலிடம் பிடித்திருக்கும். அது நிகழாததால் தென் ஆப்பிரிக்க அணி முதலிடத்தைத் தக்கவைத்துள்ளது. அதற்கடுத்த இடங்களை இந்தியா, ஆஸ்திரேலியா, இங்கிலாந்து, நியூஸிலாந்து ஆகிய அணிகள் தக்கவைத்துள்ளன.