இந்த மைதானத்தில் இன்றைக்காவது ஜெயிக்குமா ஆஸ்திரேலியா?

எக்பாஸ்டனில் இன்று நடைபெற்றுவரும் சாம்பியன்ஸ் டிராபி கிரிக்கெட் போட்டியின் 10-ஆவது ஆட்டத்தில் இங்கிலாந்தும், ஆஸ்திரேலியாவும் மோதுகின்றன.

இங்கிலாந்து அணி ஏற்கெனவே அரையிறுதிக்கு தகுதி பெற்றுவிட்டது. ஆனால் ஆஸ்திரேலிய அணிக்கோ இது வாழ்வா, சாவா ஆட்டமாகும். அந்த அணி விளையாடிய முதல் இரு ஆட்டங்களும் மழையால் கைவிடப்பட்டன. எனவே இங்கிலாந்தை வீழ்த்தினால் மட்டுமே அரையிறுதிக்கு முன்னேற முடியும் என்ற நெருக்கடியில் இருக்கிறது ஆஸ்திரேலியா. டாஸ் வென்ற இங்கிலாந்து அணி, பந்துவீச்சைத் தேர்வு செய்துள்ளது.

இந்நிலையில் எக்பாஸ்டன் மைதானம் ஆஸ்திரேலியாவுக்கு ராசியில்லாத ஒரு மைதானமாக உள்ளது. இதனால் முக்கியமான இந்தப் போட்டியில் அந்த அணி புதிய மாற்றத்தை உருவாக்குமா என்று எதிர்பார்க்கப்படுகிறது.

எக்பாஸ்டனில் ஆஸ்திரேலியா கடைசியாக விளையாடிய 8 போட்டிகளில் ஒன்றில்கூட ஜெயிக்கவில்லை. மழையால் பல ஆட்டங்களில் முடிவு எட்டப்படவில்லை. சில தோல்விகளும் பெற்றுள்ளது. இங்கு விளையாடிய கடைசி 8 ஆட்டங்களில் ஒரு வெற்றி கூட கிடைக்காததால் ஆஸ்திரேலிய ரசிகர்கள் ஒருவித கலக்கத்தில் உள்ளார்கள்.

எக்பாஸ்டனில் கடைசி 8 போட்டிகளில் ஆஸ்திரேலியா

1999 - ஆட்டம் டை 
2004 - தோல்வி
2005 - முடிவு இல்லை
2012 - ஆட்டம் ரத்து 
2013 - தோல்வி, முடிவு இல்லை, முடிவு இல்லை
2017 - முடிவு இல்லை

இன்று?