குஜராத்திடம் தோற்றது மிகப்பெரிய பின்னடைவு: மேக்ஸ்வெல்

குஜராத்துக்கு எதிரான ஆட்டத்தில் தோற்றது எங்களுக்கு மிகப்பெரிய பின்னடைவாகும் என கிங்ஸ் லெவன் பஞ்சாப் அணியின் கேப்டன் மேக்ஸ்வெல் தெரிவித்தார்.
மொஹாலியில் ஞாயிற்றுக்கிழமை நடைபெற்ற ஐபிஎல் கிரிக்கெட் தொடரின் 47-ஆவது லீக் ஆட்டத்தில் 6 விக்கெட் வித்தியாசத்தில் கிங்ஸ் லெவன் பஞ்சாபை தோற்கடித்தது குஜராத்.
இதன்பிறகு செய்தியாளர்களைச் சந்தித்த மேக்ஸ்வெல் கூறியதாவது: இந்தத் தோல்வி எங்களுக்கு மிகப்பெரிய பின்னடைவாக அமைந்துள்ளது. எங்கள் பீல்டிங் மோசமாக அமைந்தது. கேட்சுகளை கோட்டைவிட்டதால் தோற்க நேர்ந்தது. 189 ரன்கள் என்பது நல்ல ஸ்கோர்தான். ஆனால் பந்துவீச்சாளர்களும், பீல்டர்களும் மோசமாக செயல்பட்டதால் வெற்றி பெற முடியவில்லை. முக்கியமான மூன்று கேட்சுகளை நாங்கள் தவற விட்டுவிட்டோம் என்றார்.
வெற்றி குறித்துப் பேசிய குஜராத் கேப்டன் சுரேஷ் ரெய்னா, 'டுவைன் ஸ்மித்தும், இஷன் கிஷானும் நல்ல அடித்தளம் ஏற்படுத்திக் கொடுத்தனர். அதை நானும், தினேஷ் கார்த்திக்கும் சரியாக பயன்படுத்திக் கொண்டோம்' என்றார்.