இலங்கைக்கு எதிரான ஒருநாள் கிரிக்கெட் தொடரின் 5-ஆவது மற்றும் கடைசி ஒருநாள் ஆட்டத்தில் இந்தியா 6 விக்கெட்டுகள் வித்தியாசத்தில் வெற்றி பெற்றது. இதன்மூலம், 5 ஆட்டங்களைக் கொண்ட இந்த ஒருநாள் தொடரில் இலங்கையை 5-0 என்ற கணக்கில் ஒயிட்வாஷ் செய்துள்ளது இந்தியா.
இரு அணிகளுக்கு இடையே கொழும்பில் ஞாயிற்றுக்கிழமை பகலிரவாக நடைபெற்ற ஆட்டத்தில் முதலில் பேட் செய்த இலங்கை 49.4 ஓவர்களில் அனைத்து விக்கெட் இழப்புக்கு 238 ரன்கள் எடுத்தது. அடுத்து ஆடிய இந்தியா 46.3 ஓவர்களில் 4 விக்கெட் இழப்புக்கு 239 ரன்கள் எடுத்து வென்றது.
ஒருநாள் கிரிக்கெட் போட்டியில் 100 முறை ஸ்டம்பிங் செய்த உலகின் முதல் வீரர் என்ற பெருமையை தோனி தனது வசமாக்கியுள்ளார்.
யுவேந்திர சாஹலின் பந்துவீச்சில் அகிலா தனஞ்ஜெயாவைச் சாய்த்ததே தோனியின் 100-வது ஸ்டம்பிங் ஆகும். தோனி இந்த உலக சாதனையை தனது 301-வது ஒருநாள் ஆட்டத்தில் எட்டியுள்ளார். இதுதவிர தோனி மொத்தம் 281 கேட்ச்களைப் பிடித்துள்ளார்.
தோனி - சர்வதேச கிரிக்கெட்டில் ஸ்டம்பிங்குகள்
ஒருநாள் போட்டி - 100
டெஸ்ட் - 38
டி20 - 23
சர்வதேச கிரிக்கெட்டில் அதிக ஸ்டம்பிங்குகள்
தோனி - 161
சங்கக்காரா - 139
கலுவிதர்னா - 101
அதிக ஸ்டம்பிங்குகள்
டெஸ்ட்
பெர்ட் ஓல்ட்ஃபீல்ட் - 52
ஒருநாள்
100 - தோனி
டி20
32 - கம்ரான் அக்மல்