ஆசிய கோப்பை கால்பந்து 2019: கேப்டன் சுனில் சேத்ரி நம்பிக்கை

வரும் 2019 ஆசியக் கோப்பை கால்பந்து போட்டியில் சிறப்பாக ஆடுவோம் என இந்திய அணியின் கேப்டன் சுனில் சேத்ரி நம்பிக்கை தெரிவித்துள்ளார்.
ஐக்கிய அரபு நாடுகளில் வரும் ஜனவரி, பிப்ரவரி மாதங்களில் இப்போட்டி நடைபெறுகிறது. இதில் ஆசியக் கண்டத்தைச்சேர்ந்த 24 அணிகள் பங்கேற்கின்றன. கடந்த 2011-க்கு பின் இந்தியா தற்போது தான் மீண்டும் தகுதி பெற்றுள்ளது. 17 முறை நடைபெற்ற இப்போட்டியில் இந்தியா 4 முறை மட்டுமே பங்கேற்றுள்ளது.
இதில் பங்கேற்க உள்ள இந்திய அணிக்கு புதிய விளையாட்டு சீருடை அறிமுக விழா புதன்கிழமை புது தில்லியில் நடைபெற்றது.
அகில இந்திய கால்பந்து கூட்டமைப்பு தலைவர் பிரபுல் பட்டேல், பொதுச் செயலாளர் குஷால் தாஸ், பயிற்சியாளர் கான்ஸ்டான்டைன், கேப்டன் சுனில் சேத்ரி மற்றும் வீரர்கள் கலந்து கொண்டனர்.
வியாழக்கிழமை இந்திய அணி ஐக்கிய அரபு நாடுகளுக்கு புறப்பட்டுச் செல்கிறது. இரண்டு வாரங்கள் அங்கு தங்கி பயிற்சியில் ஈடுபடுகிறது.
இதன் ஒருபகுதியாக 27-ஆம் தேதி ஓமனுடன் நட்பு ஆட்டத்திலும் மோதுகிறது.
இதுதொடர்பாக கேப்டன் சுனில் சேத்ரி கூறியதாவது:
எந்த அணியையும் எதிர்கொள்ளத் தயாராக உள்ளோம். எங்கள் பிரிவில் உள்ள 3 அணிகளுமே சவாலானவை தான். எனினும் நாங்கள் சிறப்பாக தயாராகியுள்ளோம். தாய்லாந்துக்கு எதிரான முதல் ஆட்டத்தில் வென்று 3 புள்ளிகளையும் பெற வேண்டும் என்பதே முதல் நோக்கம். கடந்த 2011-இல் இந்திய அணியினர் மாதங்கள் தான் ஒருங்கிணைந்திருந்தனர்.
ஆனால் தற்போது ஐஎஸ்எல், ஐ-லீக் போட்டிகள் என தொடர்ந்து ஒன்றாக ஆடி வருகின்றனர். ஓரே அணியாக செயல்பட்டு வெற்றியை ஈட்ட முயற்சிப்போம் என்றார் சேத்ரி.
வரும் 26-ஆம் தேதி போட்டிக்கான 23 பேர் கொண்ட அணி அறிவிக்கப்பட உள்ளது.