பலவீனமாகும் தென் ஆப்பிரிக்கா: காயத்தால் டி காக்கும் விலகல்

தென் ஆப்பிரிக்க அணியின் விக்கெட் கீப்பர்-பேட்ஸ்மேனான குவின்டன் டி காக் காயம் காரணமாக, இந்தியாவுக்கு எதிரான ஒருநாள் மற்றும் டி20 கிரிக்கெட் தொடரில் இருந்து விலகியுள்ளார்.
தென் ஆப்பிரிக்க அணியில் முதலில், டெஸ்ட் போட்டியில் ஏற்பட்ட காயம் காரணமாக டி வில்லியர்ஸ் முதல் 3 ஒருநாள் ஆட்டங்களில் இருந்து விலகியுள்ளார். அடுத்து, முதல் ஒருநாள் ஆட்டத்தில் காயம் கண்ட கேப்டன் டூ பிளெஸ்ஸிஸ், ஒருநாள் தொடரின் எஞ்சிய ஆட்டங்களில் இருந்து விலகினார்.
இந்நிலையில், செஞ்சுரியனில் நடைபெற்ற 2-ஆவது ஒருநாள் ஆட்டத்தில் டி காக் பேட்டிங் செய்தபோது அவரது இடதுகை மணிக்கட்டுப் பகுதியில் காயம் ஏற்பட்டது. அதிலிருந்து அவர் முழுமையாக மீள 2 முதல் 4 வாரங்கள் தேவைப்படும் என்றும், எனவே, எஞ்சிய 4 ஒருநாள் ஆட்டங்கள், மற்றும் டி20 தொடரில் இருந்து அவர் விலகுவதாகவும் தெரிவிக்கப்பட்டுள்ளது.
டி காக்கிற்கு பதிலாக மாற்று வீரரை தென் ஆப்பிரிக்கா நியமிக்கவில்லை. முன்னதாக, டூ பிளெஸ்ஸிஸ் விலகலுக்குப் பிறகு விக்கெட் கீப்பர்-பேட்ஸ்மேனாக ஹென்ரிச் கிளேசன் அணியில் இணைந்திருந்தார். எனவே, கேப் டவுனில் நடைபெறும் 3-ஆவது ஒருநாள் ஆட்டத்தின் மூலம் சர்வதேச ஒருநாள் போட்டிகளில் அவர் முதல் முறையாக களம் காண்பார் என எதிர்பார்க்கப்படுகிறது. ஒருநாள் தொடரின் முதல் இரு ஆட்டங்களில் இந்தியா வென்றுள்ளது குறிப்பிடத்தக்கது.