எம்சிசி முருகப்பா தங்கக்கோப்பை ஹாக்கி: இந்திய கடற்படை, ரயில்வே வாரியம் வெற்றி

சென்னையில் நடைபெறும் 92-ஆவது எம்சிசி முருகப்பா தங்கக் கோப்பை ஹாக்கிப் போட்டி துவக்க ஆட்டங்களில் இந்திய கடற்படை, ரயில்வே விளையாட்டு மேம்பாட்டு வாரிய அணிகள் வெற்றி பெற்றன.
சென்னை எழும்பூர் மேயர் ராதாகிருஷ்ணன் ஹாக்கி மைதானத்தில் எம்சிசி முருகப்பா தங்கக் கோப்பை ஹாக்கி போட்டிகள் வியாழக்கிழமை தொடங்கின. இதில் மொத்தம் 10 அணிகள் இரு பிரிவுகளாக பிரிக்கப்பட்டு பங்கேற்றுள்ளன. முதலிரண்டு இடங்களைப் பெறும் அணிகளுக்கு முறையே ரூ.5 லட்சம், ரூ.2.5 லட்சம் ரொக்கப் பரிசுகள் வழங்கப்பட உள்ளது. வரும் 16-ஆம் தேதி வரை போட்டிகள் நடக்கின்றன.
துவக்க நாளான வியாழக்கிழமை முதல் ஆட்டத்தில் சென்னை ஹாக்கி சங்கம்-இந்திய கடற்படை அணிகள் மோதின. இதில் இரு அணி வீரர்களும் தொடக்கம் முதலே ஆதிக்கம் செலுத்த முனைந்தனர். 
முதல் பாதி இடைவேளையில் கடற்படை அணி 1-0 என முன்னிலை பெற்றிருந்தது. ஆட்ட முடிவில் 3-2 என்ற கோல் கணக்கில் இந்திய கடற்படை வெற்றி பெற்றது. இரண்டாவது ஆட்டத்தில் ரயில்வே விளையாட்டு மேம்பாட்டு வாரிய அணி-மும்பை ஹாக்கி சங்க அணிகள் மோதின. இதில் 2-1 என்ற கோல் கணக்கில் ரயில்வே வாரிய அணி வென்றது.