யு.எஸ். ஓபன்: அரையிறுதியில் மோதும் வீரர்கள்!

யு.எஸ். ஓபன் போட்டியின் காலிறுதியில் மில்மேனைத் தோற்கடித்து அரையிறுதிக்குள் நுழைந்துள்ளார் ஜோகோவிச்.

அமெரிக்காவின் நியூயார்க் நகரில் நடைபெற்று இப்போட்டியில் ஆடவர் ஒற்றையர் பிரிவு காலிறுதி ஒன்றில் ஜோகோவிச்சும் ஜான் மில்மேனும் மோதினார்கள். 5 முறை யு.எஸ். ஓபன் சாம்பியனான ஸ்விட்சர்லாந்தின் ரோஜர் ஃபெடரரை 4-வது சுற்றில் வீழ்த்தினார் ஆஸ்திரேலியாவின் மில்மேன். இதனால் இவர் பங்கேற்கும் காலிறுதி ஆட்டம் வெகுவாக எதிர்பார்க்கப்பட்டது. 

ஆனால் ஜோகோவிச் மில்மேனுக்கு வாய்ப்பு எதுவும் தராமல் 6-3, 6-4, 6-4 என நேர் செட்களில் வென்று அரையிறுதிக்கு முன்னேறினார். யு.எஸ். ஓபன் போட்டியில் 11-வது முறையாக அரையிறுதிச் சுற்றுக்குள் அவர் முன்னேறியுள்ளார்.

இதையடுத்து ஆடவர் ஒற்றையர் அரையிறுதிச் சுற்றுக்கு நடால், டெல் பொட்ரோ, நிஷிகோரி, ஜோகோவிச் ஆகியோர் தகுதி பெற்றார்கள். நடால் - டெல் பொட்ரோ, ஜோகோவிச் - நிஷிகோரி என அரையுறுதி ஆட்டங்கள் நடைபெறவுள்ளன.