நடிகர்களைக் கீழ்த்தரமாக விமரிசித்து அதை ட்விட்டரில் டிரெண்ட் ஆக்குவதா?: கிரிக்கெட் வீரர் அஸ்வின் சாடல்!

RIPactorVIJAY என்றொரு ஹேஷ்டேக் சமீபத்தில் ட்விட்டரில் டிரெண்டிங் ஆனது. வெவ்வேறு நடிகர்களின் ரசிகர்கள் தங்களுடைய போட்டி நடிகர்களை அவமரியாதை செய்யும் விதமாக இதுபோன்ற ஹேஷ்டேக்குகளை அவ்வப்போது ட்விட்டரில் டிரெண்டிங் செய்வார்கள். போட்டி மனப்பான்மையுடனும் பகைமை உணர்வுடன் ட்விட்டரில் இதுபோன்ற செயல்களை அடிக்கடிக் காணமுடியும். 

இந்நிலையில் இளம் ரசிகர்களின் இந்தப் போக்கைக் கண்டித்துள்ளார் கிரிக்கெட் வீரர் அஸ்வின். ட்விட்டரில் அவர் கூறியதாவது:

சில நாள்களுக்கு முன்பு விண்கற்களால் நம் பூமி தாக்கப்படாமல் தப்பித்தது. முறையற்ற பருவமழை வெவ்வேறு நகரங்களைத் தாக்கியுள்ளது. நம் நாட்டின் பல இடங்கள் வறட்சியை எதிர்கொண்டுள்ளன. நம்மைத் தொந்தரவு செய்யும் குற்றச் செயல்கள் பேசப்படுகின்றன. ஆனால் நம் மாநிலத்தின் இளைய தலைமுறை  RIPactorVIJAY என்கிற ஹேஷ்டேகை டிரெண்டிங் செய்கிறார்கள் என்று தன் வேதனையை வெளிப்படுத்தியுள்ளார்.