கோலி சதம் வீண்: 3-ஆவது ஒருநாள் போட்டியில் ஆஸ்திரேலியா வெற்றி

ஆஸ்திரேலியாவுடனான 3-ஆவது ஒருநாள் போட்டியில் கோலி சதமடித்தும் இந்திய அணி 32 ரன்கள் வித்தியாசத்தில் தோல்வியடைந்துள்ளது. 

இந்தியா, ஆஸ்திரேலியா அணிகளுக்கிடையிலான 3-ஆவது ஒருநாள் போட்டி ராஞ்சியில் நடைபெற்றது. டாஸ் வென்ற இந்திய அணி ஃபீல்டிங்கைத் தேர்வு செய்தது. அதன்படி முதலில் களமிறங்கிய ஆஸ்திரேலிய அணி நிர்ணயிக்கப்பட்ட 50 ஓவர்கள் முடிவில் 5 விக்கெட்டுகளை இழந்து 313 ரன்கள் குவித்தது. 

ஆஸ்திரேலிய அணி பேட்டிங் விவரம்: https://www.dinamani.com/sports/sports-news/2019/mar/08/usman-khawajas-maiden-odi-century-3109866.html

இதையடுத்து, 314 ரன்கள் என்ற கடின இலக்கை நோக்கி இந்திய அணி களமிறங்கியது. தவான் 1, ரோஹித் 14, ராயுடு 2 என அடுத்தடுத்து ஆட்டமிழந்து மோசமான துவக்கத்தை அளித்தனர். அதன்பிறகு, கோலியுடன் இணைந்து அணியை ஓரளவுக்கு சரிவில் இருந்து மீட்டார் தோனி. அவர் 26 ரன்கள் எடுத்திருந்த நிலையில் ஸாம்பா பந்தில் ஆட்டமிழந்தார். 

இதையடுத்து, கோலியுடன் ஜாதவ் ஜோடி சேர்ந்தார். இந்த கூட்டணியில் கோலி பெரும்பாலான ஸ்டிரைக்கை எடுத்து துரிதமாக ரன் குவித்து வெற்றிக்கு தேவையான ரன் ரேட்டை கட்டுப்பாட்டிலேயே வைத்திருந்தார். இந்த ஜோடி நல்ல நிலையில் விளையாடி வந்தபோது ஜாதவ் 26 ரன்களுக்கு ஆட்டமிழந்தார். 

எனினும், விராட் கோலி மீண்டும் விஜய் சங்கருடன் இணைந்து மீண்டும் இலக்கை நோக்கி துரிதமாக ரன் குவித்தார். இதன்மூலம், சர்வதேச ஒருநாள் கிரிக்கெட் அரங்கில் அவர் 41-ஆவது சதத்தை பதிவு செய்தார். 

இதையடுத்து, 38-ஆவது ஓவரில் அடுத்தடுத்து 2 பந்துகளில் பவுண்டரி அடித்த கோலி 3-ஆவது பந்தில் போல்டாகி ஆட்டமிழந்தார். அவர் 95 பந்துகளில் 16 பவுண்டரி, 1 சிக்ஸர் உட்பட 123 ரன்கள் எடுத்தார். அதன்பிறகு பொறுப்பை ஏற்று சற்று அதிரடியை வெளிப்படுத்திய சங்கரும் 32 ரன்களில் ஆட்டமிழந்தார். அவரைத்தொடர்ந்து, துரிதமாக ரன் குவிக்க திணறி வந்த ஜடேஜா 24 ரன்களில் ஆட்டமிழந்தார்.

இதனால், இந்திய அணி 48.2 ஓவர்கள் முடிவில் 281 ரன்களுக்கு ஆட்டமிழந்து 32 ரன்கள் வித்தியாசத்தில் தோல்வியடைந்தது. 

இந்திய அணியில் விராட் கோலி அதிகபட்சமாக 123 ரன்கள் எடுத்தார். அவருக்கு அடுத்தபடியான அதிகபட்ச ஸ்கோர் 32. இந்த 123 ரன்னுக்கும், 32 ரன்னுக்கும் இடையே இருக்கும் இடைவெளி ஆஸ்திரேலிய அணியின் வெற்றியை தீர்மானித்தது. 

இதன்மூலம், 5 போட்டிகள் கொண்ட ஒருநாள் தொடரில் இந்திய அணி 2-1 என்ற நிலையில் உள்ளது.