என்னைத் தேர்வு செய்யாதது ஏன்?: கேள்வி எழுப்பும் வேகப்பந்து வீச்சாளர்!

26 வயது பரிந்தர் ஸ்ரண், இந்திய அணிக்காக 6 ஒருநாள் ஆட்டங்களிலும் 2 டி20 ஆட்டங்களிலும் விளையாடியுள்ளார். 

இந்நிலையில் இந்த வருடம் விஜய் ஹசாரே போட்டியில் பஞ்சாப் அணிக்காக அல்லாமல் சண்டிகர் அணிக்காக விளையாடவுள்ளதாக ஸ்ரண் அறிவித்துள்ளார். பஞ்சாப் அணியில் இடம் கிடைக்காத நிலையில் இந்த முடிவை அவர் எடுத்துள்ளார். 

என்னைத் தேர்வு செய்யாததற்குத் தேர்வுக்குழுவினர் எந்தக் காரணமும் சொல்லவில்லை. நான் இந்திய அணிக்காக மீண்டும் விளையாட ஆசைப்படுகிறேன். அதற்கு முதலில் நான் விளையாடவேண்டும். எனவே தான் அணி மாறியுள்ளேன். என்னை பஞ்சாப் அணிக்குத் தேர்வு செய்யாதது ஏன் என்கிற காரணத்தைத் தெரிந்துகொள்ள விரும்புகிறேன். ஆனால் தேர்வுக்குழுவினர் என்னுடைய தொலைப்பேசி அழைப்புகளைத் தவிர்த்துவிட்டார்கள். என்னால் முழு வருடத்தையும் வீணடிக்க முடியாது என்று ஒரு பேட்டியில் ஸ்ரண் கூறியுள்ளார். 

கடந்த வருடம் பஞ்சாப் அணிக்காக விளையாடிய பரிந்தர் ஸ்ரண், விஜய் ஹசாரே போட்டியில் 3 ஆட்டங்களில் 3 விக்கெட்டுகளும் இரண்டு ரஞ்சி ஆட்டங்களில் 2 விக்கெட்டுகளும் சையத் முஷ்டாக் அலி கோப்பைப் போட்டியில் விளையாடிய 5 ஆட்டங்களில் 3 விக்கெட்டுகளும் எடுத்தார். எதிர்பார்த்தபடி அதிக விக்கெட்டுகள் எடுக்காததால் இந்த வருடம் பஞ்சாப் அணியிலிருந்து அவர் நீக்கப்பட்டுள்ளார். இதையடுத்து அவர் அணி மாறியுள்ளார்.