கோலியை ஆட்டமிழக்கச் செய்ய எளிய திட்டம்: போட்டு உடைத்த ராபின்சன்

இந்திய கேப்டன் விராட் கோலியை ஆட்டமிழக்கச் செய்வதற்கான எளிய திட்டத்தை இங்கிலாந்து இளம் வேகப்பந்துவீச்சாளர் ஆலி ராபின்சன் சனிக்கிழமை கூறினார்.

இந்தியாவுடனான 3-வது டெஸ்ட் ஆட்டத்தில் இங்கிலாந்து ஒரு இன்னிங்ஸ் மற்றும் 76 ரன்கள் வித்தியாசத்தில் வெற்றி பெற்றது. இரண்டாவது இன்னிங்ஸில் 5 விக்கெட்டுகளை வீழ்த்திய ஆலி ராபின்சன் ஆட்ட நாயகனாகத் தேர்வு செய்யப்பட்டார்.

இதையும் படிக்க | இங்கிலாந்தின் வெற்றிகரமான டெஸ்ட் கேப்டன்: ஜோ ரூட் சாதனை

பரிசளிப்பு விழாவில் ராபின்சன் கூறியது:

"இங்கிலாந்துக்கான எனது முதல் வெற்றியில் ஆட்ட நாயகனாகத் தேர்வு செய்யப்பட்டிருப்பது உண்மையில் எனது கனவு. இங்கு பந்துவீசுவதை முன்பே அனுபவித்திருக்கிறேன். சூழல்களைப் பயன்படுத்தியிருப்பது நல்லது. எனவே 5 விக்கெட்டுகளை வீழ்த்தியிருப்பது எனக்கு மகிழ்ச்சியளிக்கிறது.

ஜேம்ஸ் ஆண்டர்சனுடன் இணைந்து பந்துவீசி, அவரிடமிருந்து கற்றுக்கொள்வது பெருமைக்குரியது. அது எனது ஆட்டத்தை மேம்படுத்தியுள்ளது. தொடர்ந்து கற்றுக்கொண்டு, முடிந்தளவுக்கு சிறப்பாகப் பந்துவீச முயற்சிப்பேன்.

எனது ஓவரில் 2 பவுண்டரிகளை விளாசிய பிறகு கோலி விக்கெட்டை வீழ்த்தியது மகிழ்ச்சி. அவரை ஆட்டமிழக்கச் செய்வதற்கு எளிதான திட்டம்தான். 4-வது அல்லது 5-வது ஸ்டம்புகளில் அவர் பேட்டின் எட்ஜ் பகுதியில் வாங்குவார் என்ற நம்பிக்கையுடன் வெளியே திரும்புவது போன்று பந்தை வீச வேண்டும். அவர் அதையே செய்தார்."