ரசிகர்கள் ஏமாற்றம்: சிட்னி டெஸ்டுக்குத் தேர்வாகாத நடராஜன்!

ஆஸ்திரேலியாவுக்கு எதிரான 3-வது டெஸ்டில் தமிழக வீரர் நடராஜன் தேர்வாக வாய்ப்புள்ளதாகப் பலரும் எண்ணியிருந்த நிலையில் அவருக்குப் பதிலாக நவ்தீப் சைனி, டெஸ்ட் கிரிக்கெட்டுக்கு அறிமுகமாகவுள்ளார்.

ஆஸ்திரேலியாவுக்குச் சுற்றுப்பயணம் மேற்கொண்டுள்ள இந்திய அணி, டெஸ்ட், ஒருநாள், டி20 தொடா்களில் விளையாடுகிறது.

ஒருநாள் தொடரை 1-2 எனத் தோற்றது இந்திய அணி. எனினும் டி20 தொடரை 2-1 என வென்றது. 

இந்தியாவுக்கு எதிரான முதல் டெஸ்ட் கிரிக்கெட் ஆட்டத்தில் 8 விக்கெட் வித்தியாசத்தில் அபார வெற்றி கண்டது ஆஸ்திரேலியா. மெல்போர்னில் நடைபெற்ற 2-வது டெஸ்டில் இந்திய அணி 8 விக்கெட் வித்தியாசத்தில் வென்று தொடரை 1-1 என சமன் செய்துள்ளது. 3-வது டெஸ்ட் சிட்னியில் நாளை முதல் தொடங்குகிறது. 4-வது டெஸ்ட் பிரிஸ்பேனில் ஜனவரி 15-ல் தொடங்குகிறது.

இந்நிலையில் சிட்னி டெஸ்டில் விளையாடவுள்ள இந்திய அணி இன்று அறிவிக்கப்பட்டுள்ளது. இந்திய அணியிலிருந்து மயங்க் அகர்வால் நீக்கப்பட்டுள்ளார். கடந்த டெஸ்டில் விளையாடிய உமேஷ் யாதவ், காயம் காரணமாக தொடரிலிருந்து விலகியுள்ளார். இதனால் சிட்னி டெஸ்டில் ரோஹித் சர்மா, சைனி ஆகியோர் இடம்பெற்றுள்ளார்கள். விஹாரி தனது இடத்தைத் தக்கவைத்துக்கொண்டுள்ளார். டெஸ்ட் கிரிக்கெட்டுக்கு அறிமுகமாகும் சைனி, சிராஜ் போல கவனம் ஈர்ப்பார் என ரசிகர்கள் எதிர்பார்க்கிறார்கள்.

தமிழக வீரர் நடராஜன், சிட்னி டெஸ்டில் அறிமுகமாவார் என பலரும் ஆசைப்பட்டார்கள். ஆனால் நடராஜனின் டெஸ்ட் அறிமுகம் சிட்னியில் நிகழவில்லை. ஆஸ்திரேலியச் சுற்றுப்பயணத்தில் வலைப்பயிற்சிப் பந்துவீச்சாளராகத் தேர்வான நடராஜன், ஒருநாள், டி20 கிரிக்கெட் ஆட்டங்களில் அறிமுகமாகி அசத்தினார். பலருடைய பாராட்டுகளைப் பெற்றார். 2-வது டெஸ்டில் உமேஷ் யாதவுக்குக் காயம் ஏற்பட்டதால் டெஸ்ட் அணியிலும் நடராஜனுக்கு வாய்ப்பு கிடைத்துள்ளது. இதனால் 3-வது டெஸ்டில் நடராஜன் இடம்பெறுவார் எனப் பலரும் எண்ணினார்கள். ஆனால் நடராஜனுக்கு முன்பு சைனி இந்திய அணிக்குத் தேர்வானதால் 3-வது டெஸ்டில் அவர் அறிமுகமாகவுள்ளார்.

எனினும் 4-வது டெஸ்டிலாவது நடராஜனுக்கு வாய்ப்பு கிடைத்து டெஸ்ட் கிரிக்கெட்டுக்கு அறிமுகமாக வேண்டும் என அவருடைய ரசிகர்கள் நம்பிக்கையுடன் காத்திருக்கிறார்கள்.