இந்திய டெஸ்ட் அணியில் விரைவில் மாற்றம் : விராட் கோலி

இந்திய டெஸ்ட் அணியில் விரைவில் மாற்றம் ஏற்படும் என இந்திய அணியின் கேப்டன் விராட் கோலி கூறியுள்ளார்.

உலக டெஸ்ட் சாம்பியன்ஷிப் போட்டியின் இறுதி ஆட்டத்தில் நியூசிலாந்து 8 விக்கெட்டுகள் வித்தியாசத்தில் இந்தியாவை வீழ்த்தி சாம்பியன் ஆனது.

டெஸ்ட் கிரிக்கெட்டின் 144 ஆண்டுகால வரலாற்றில் முதல் முறையாக நடத்தப்பட்ட இந்த சாம்பியன்ஷிப் போட்டியில் பட்டத்தை வென்று புதிய வரலாறு படைத்துள்ளது நியூசிலாந்து.

தோல்விக்குப் பிறகு செய்தியாளர்களிடம் கோலி கூறியதாவது:

இந்திய அணியில் இடம்பெறக் கூடிய வீரர்கள் குறித்து மீண்டும் விவாதித்து ஒரு முடிவுக்கு வருவோம். அணியைப் பலப்படுத்த என்னென்ன செய்ய வேண்டும் என முடிவெடுப்போம். ஒரே மாதிரியாக அணியைத் தேர்வு செய்யும் நடைமுறையைத் தொடர மாட்டோம்.

அடுத்த திட்டத்துக்காக ஒரு வருடம் வரை காத்திருக்க மாட்டோம். எங்கள் வெள்ளைப் பந்து அணியில் ஏராளமான வீரர்கள் திறமையை வெளிப்படுத்த தயாராகவும் நம்பிக்கையுடனும் உள்ளார்கள். அதேபோல டெஸ்ட் அணியையும் தயார் செய்ய வேண்டும். அணிக்கு எந்த மாதிரியான வீரர்கள் சரியாக இருப்பார்கள், துணிச்சலுடன் சவாலை எதிர்கொள்வார்கள் என்பதைப் பார்க்க வேண்டும். சரியான மனநிலையுடன் உள்ள வீரர்களை அணிக்குக் கொண்டு வர வேண்டும் என்றார்.