காமன்வெல்த்: முதல் ஆட்டத்தில் இந்தியா - ஆஸ்திரேலியா மோதல்

அடுத்த ஆண்டு நடைபெறவுள்ள காமன்வெல்த் விளையாட்டுப் போட்டியில் மகளிா் கிரிக்கெட்டின் முதல் ஆட்டத்தில் இந்தியா - ஆஸ்திரேலியா அணிகள் 29-ஆம் தேதி மோதுகின்றன.

இங்கிலாந்தின் பிா்மிங்ஹாம் நகரில் நடைபெறும் இந்தப் போட்டியில் தான், காமன்வெல்த் வரலாற்றிலேயே முதல் முறையாக டி20 கிரிக்கெட் சோ்க்கப்பட்டுள்ளது குறிப்பிடத்தக்கது. இதற்கு முன் கடந்த 1998-இல் கோலாலம்பூரில் நடைபெற்ற காமன்வெல்த் விளையாட்டுப் போட்டியில் ஒன் டே ஆட்டமாக கிரிக்கெட் விளையாடப்பட்டிருந்தது.

வெள்ளிக்கிழமை வெளியான அட்டவணைப்படி, இறுதி ஆட்டம் ஆகஸ்ட் 7-ஆம் தேதி நடைபெறவுள்ளது. அன்றையே தினமே வெண்கலப் பதக்கத்துக்கான ஆட்டமும் நடைபெறும். இதர ஆட்டங்களில் இந்தியா ஜூலை 31-ஆம் தேதி பாகிஸ்தானையும், பாகிஸ்தான் ஆகஸ்ட் 3-ஆம் தேதி ஆஸ்திரேலியாவையும், இங்கிலாந்து ஜூலை 30-ஆம் தேதி தகுதிச்சுற்றிலிருந்து வரும் அணியையும் சந்திக்கின்றன.

இங்கிலாந்து அணி பின்னா் தென் ஆப்பிரிக்காவை ஆகஸ்ட் 2-ஆம் தேதியும், அடுத்து நியூஸிலாந்தை ஆகஸ்ட் 4-ஆம் தேதியும் எதிா்கொள்கிறது.