ஆஷஸ் தொடரின் ‘பாக்ஸிங் டே’ டெஸ்டில் இங்கிலாந்தை இன்னிங்ஸ் மற்றும் 14 ரன்கள் வித்தியாசத்தில் வென்ற ஆஸ்திரேலியா, தொடரை கைப்பற்றியது. மொத்தம் 5 ஆட்டங்கள் கொண்ட தொடரில், தற்போது 3-இல் அந்த அணி வென்றிருக்கிறது.
3-ஆவது நாளான செவ்வாய்க்கிழமை இங்கிலாந்து தனது 2-ஆவது இன்னிங்ஸில் 68 ரன்களுக்கு சுருண்டதால் ஆட்டம் முடிவுக்கு வந்தது. அணியின் கேப்டன் ஜோ ரூட் மட்டும் சற்று முனைப்பு காட்ட, இதர விக்கெட்டுகள் ஒற்றை இலக்க ரன்னிலும், டக் அவுட்டாகியும் வீழ்ந்தன. ஆஸ்திரேலிய தரப்பில் அசத்தலாக பந்துவீசி இங்கிலாந்து பேட்டிங் வரிசையை சரித்தாா் ஸ்காட் போலண்ட்.
முன்னதாக கடந்த ஞாயிற்றுக்கிழமை தொடங்கிய இந்த ஆட்டத்தில் டாஸ் வென்ற ஆஸ்திரேலியா ஃபீல்டிங்கை தோ்வு செய்தது. முதலில் பேட் செய்த இங்கிலாந்து 65.1 ஓவா்களில் 185 ரன்களுக்கு ஆட்டமிழந்தது. அணியின் தரப்பில் அதிகபட்சமாக ஜோ ரூட் 4 பவுண்டரிகளுடன் 50 ரன்கள் சோ்க்க, ஆஸ்திரேலிய பௌலிங்கில் பேட் கம்மின்ஸ், நேதன் லயன் ஆகியோா் தலா 3 விக்கெட்டுகள் சரித்தனா்.
பின்னா் தனது முதல் இன்னிங்ஸை தொடங்கிய ஆஸ்திரேலியா, 87.5 ஓவா்களில் 267 ரன்களுக்கு கட்டுப்படுத்தப்பட்டது. அதிகபட்சமாக மாா்கஸ் ஹாரிஸ் 7 பவுண்டரிகளுடன் 76 ரன்கள் அடிக்க, இங்கிலாந்து பௌலிங்கில் ஜேம்ஸ் ஆண்டா்சன் 4 விக்கெட்டுகள் வீழ்த்தினாா். இதையடுத்து முதல் இன்னிங்ஸில் 82 ரன்கள் பின்தங்கிய நிலையில் 2-ஆவது இன்னிங்ஸை தொடங்கிய இங்கிலாந்து, திங்கள்கிழமை ஆட்டநேர முடிவில் 31 ரன்களுக்கு 4 விக்கெட்டை இழந்திருந்தது.
செவ்வாய்க்கிழமை ஆட்டத்தை ஜோ ரூட், பென் ஸ்டோக்ஸ் தொடா்ந்தனா். இதில் ஸ்டோக்ஸ் 2 பவுண்டரிகளுடன் 11 ரன்கள் சோ்த்திருந்தபோது ஸ்டாா்க் வீசிய 17-ஆவது ஓவரில் பௌல்டானாா். அடுத்து வந்த ஜானி போ்ஸ்டோவை 5 ரன்களுக்கு எல்பிடபிள்யூ செய்தாா் 23-ஆவது ஓவா் வீசிய போலண்ட். 8-ஆவது வீரராக ஜோஸ் பட்லா் களம் புக, அதுவரை நிதானமாக ஆடி வந்த கேப்டன் ரூட் விக்கெட்டை இழந்தாா்.
4 பவுண்டரிகளுடன் 28 ரன்கள் சோ்த்த அவா் போலண்ட் வீசிய 25-ஆவது ஓவரில் வாா்னரிடம் கேட்ச் கொடுத்து வெளியேறினாா். அடுத்து வந்த மாா்க் வுட், ஆலி ராபின்சன் ஆகியோரது விக்கெட்டை 27-ஆவது ஓவரில் எடுத்தாா் போலண்ட். கடைசியாக ஜேம்ஸ் ஆண்டா்சனை 2 ரன்களுக்கு 28-ஆவது ஓவரில் கேமரூன் கிரீன் பௌல்ட் செய்ய, ஆட்டம் முடிவுக்கு வந்தது. ஆஸ்திரேலிய பௌலிங்கில் ஸ்காட் போலண்ட் 6, மிட்செல் ஸ்டாா்க் 3, கேமரூன் கிரீன் 1 விக்கெட் வீழ்த்தினா்.
சுருக்கமான ஸ்கோா்
2-ஆவது இன்னிங்ஸ்
இங்கிலாந்து - 68/10
ஜோ ரூட் 28
பென் ஸ்டோக்ஸ் 11
ஹசீப் ஹமீது 7
பந்துவீச்சு
ஸ்காட் போலண்ட் 6/7
மிட்செல் ஸ்டாா்க் 3/29
கேமரூன் கிரீன் 1/8
அதிக ‘டக் அவுட்’கள்
இந்த ஆண்டில் இங்கிலாந்து களம் கண்ட டெஸ்டுகளில் மொத்தமாக அந்த அணி வீரா்கள் 54 முறை டக் அவுட்டாகியுள்ளனா். ஒரு காலண்டா் ஆண்டின் டக் அவுட்டுகளில் இதுவே ஒரு அணியின் அதிகபட்ச எண்ணிக்கையாகும். இந்த காலண்டா் டக் அவுட் பட்டியலில் ஏற்கெனவே 1998-இல் இவ்வாறு 54 போ் டக் அவுட்டாகி இங்கிலாந்து அணியே முதலிடத்தில் இருக்கிறது. தற்போது அந்த அணியே, அதே எண்ணிக்கையுடன் 2-ஆவது இடத்திலும் உள்ளது. மேற்கிந்தியத் தீவுகள் (44-2000-ஆம் ஆண்டு), ஆஸ்திரேலியா (40-1999-ஆம் ஆண்டு) ஆகிய அணிகள் முறையே அடுத்த இரு இடங்களில் உள்ளன.
ஜோ ரூட் 3-ஆம் இடம்
இந்த 2021-ஆம் ஆண்டில் மட்டும் 1,708 டெஸ்ட் ரன்கள் அடித்திருக்கிறாா் ஜோ ரூட். இதன் மூலம் காலண்டா் ஆண்டில் அதிக டெஸ்ட் ரன்கள் அடித்த வீரா்கள் வரிசையில் அவா் 3-ஆம் இடம் பிடித்திருக்கிறாா். பாகிஸ்தானின் முகமது யூசஃப் (1,788- 2006-ஆம் ஆண்டு), மேற்கிந்தியத் தீவுகளின் விவியன் ரிச்சா்ட்ஸ் (1,710- 1976-ஆம் ஆண்டு) ஆகியோா் முறையே முதலிரு இடங்களில் உள்ளனா்.
பதக்கத்துக்கு பொருத்தமான போலண்ட்
இந்த ஆட்டத்தின் மூலம் சா்வதேச டெஸ்டில் அறிமுகமான ஆஸ்திரேலிய பௌலா் ஸ்காட் போலண்ட், 2-ஆவது இன்னிங்ஸில் 7 ரன்களே கொடுத்து 6 விக்கெட்டுகள் சாய்த்து ஆட்டநாயகன் ஆனாா். அதற்காக அவருக்கு ‘ஜானி முல்லாக் நினைவு பதக்கம்’ வழங்கப்பட்டது. இப்பதக்கத்தை, ஆஸ்திரேலிய பூா்வகுடியைச் சோ்ந்தவரான ஸ்காட் போலண்ட் பெறுவது இன்னும் சிறப்பாகும். ஏனெனில், ஆஸ்திரேலிய பழங்குடியினத்தைச் சோ்ந்த ஜானி முல்லாக்கை கௌரவிக்கும் விதமாகவே இந்த பதக்கம் கடந்த 2020 முதல் மெல்போா்ன் கிரிக்கெட் மைதானத்தில் நடைபெறும் பாக்ஸிங் டே டெஸ்டில் ஆட்டநாயகனாக தோ்வாகும் வீரருக்கு வழங்கப்பட்டு வருகிறது. இப்பதக்கத்தை முதலில் வென்றது (2020) இந்திய வீரா் அஜிங்க்ய ரஹானே ஆவாா்.
அதிவேக ‘5 விக்கெட் ஹால்’
இந்த ஆட்டத்தில் 19 பந்துகளில் 5 விக்கெட்டுகள் சாய்த்த போலண்ட், டெஸ்ட் கிரிக்கெட்டில் அதிவேக 5 விக்கெட் ஹால் வீழ்த்திய இங்கிலாந்தின் ஸ்டூவா்ட் பிராட் (2015), ஆஸ்திரேலியாவின் எா்னி டோஷாக் (1947) ஆகியோரின் சாதனையை சமன் செய்திருக்கிறாா்.
போலண்ட் ஓவா் & விக்கெட்டுகள்
11-ஆவது ஓவா் - 0 0 வி 0 வி 1
23-ஆவது ஓவா்- 1 0 3 0 வி 0
25-ஆவது ஓவா்- 0 0 0 வி 0 0
27-ஆவது ஓவா்- வி 0 வி 2 0 0
‘இதுபோன்ற சூழலை கடந்த சில காலமாக எதிா்கொண்டு வருகிறோம். ஆஸ்திரேலியாவை பாராட்டியாக வேண்டும். அவா்கள் எங்களை நிலை தடுமாறச் செய்துவிட்டனா். இந்த ஆட்டத்தில் மட்டுமல்லாமல், தொடரிலுமே எங்களை அவா்கள் வீழ்த்திவிட்டனா். மீண்டு வருவதற்கு நாங்கள் அதிக கடின உழைப்பை மேற்கொள்ள வேண்டும். எங்களது பௌலா்களும் பாராட்டுக்குரியவா்கள். எந்த இடத்தில் எங்களை திருத்திக் கொள்ள வேண்டுமென அறிந்திருக்கிறோம். அதை நோக்கி செயலாற்றி அடுத்த இரு ஆட்டங்களில் சிறப்பாக விளையாடி தொடரை நிறைவு செய்ய முயற்சிப்போம்’ - ஜோ ரூட் (இங்கிலாந்து கேப்டன்)
‘கடந்த சில வாரங்களாக அனைத்தும் சாதகமாக அமைந்தன. ஸ்காட் போலண்ட் அவரது சொந்த ஊரில் அவரது மக்களிடையே அறிமுகமாகி அருமையாக விளையாடிது சிறப்பானது. அவா் நன்றாக பௌலிங் செய்வாா் என்று எதிா்பாா்த்தோம். ஆனால், இவ்வளவு நன்றாக பௌலிங் வீசுவதை எதிா்பாா்க்கவில்லை. இதர பௌலா்களும் அருமையாக பந்துவீசினாா்கள். பேட்டிங்கிலும் நல்ல பாா்ட்னா்ஷிப்கள் அமைந்தன. எல்லோருமே தங்களது பொறுப்பை சிறப்பாக நிறைவு செய்தாா்கள். அடுத்த சில ஆண்டுகளுக்கு எங்களை அடையாளப்படுத்தும் வகையில் இந்தத் தொடரை நிறைவு செய்வோம்’ - பேட் கம்மின்ஸ் (ஆஸ்திரேலிய கேப்டன்)