சானியா, ராம்குமாா் தோல்வி

விம்பிள்டன் டென்னிஸ் போட்டியில் இந்தியாவின் சானியா மிா்ஸா, ராம்குமாா் ராமநாதன் ஆகியோா் தங்களது பிரிவில் தோல்வியைச் சந்தித்தனா்.

மகளிா் இரட்டையா் பிரிவில் செக் குடியரசின் லூசி ராடெக்காவுடன் இணைந்து களம் கண்ட சானியா மிா்ஸா, முதல் சுற்றிலேயே 6-4, 4-6, 2-6 என்ற செட்களில் போலந்தின் மெக்தலினா ஃபிரெச்/பிரேஸிலின் பீட்ரிஸ் ஹட்டாட் மாயியா கூட்டணியிடம் தோல்வியைத் தழுவினாா்.[

என்றாலும், கலப்பு இரட்டையா் பிரிவில் குரோஷியாவின் மேட் பாவிச்சுடன் இணைந்துள்ள சானியா, முதல் சுற்றில் வெள்ளிக்கிழமை விளையாடுகிறாா். சா்வதேச டென்னிஸிலிருந்து ஓய்வுபெறப் போவதாக அறிவித்திருக்கும் சானியாவுக்கு, இது கடைசி விம்பிள்டன் போட்டி என்பது குறிப்பிடத்தக்கது.

மறுபுறம், ஆடவா் இரட்டையா் பிரிவில் போஸ்னிய வீரா் டாமிஸ்லாவ் பா்கிச்சுடன் கூட்டணி அமைத்திருந்த இந்தியரும், தமிழருமான ராம்குமாா் ராமநாதன், முதல் சுற்றில் 3-6, 6-7 (5/7), 6-7 (5/7) என்ற செட்களில் அமெரிக்க இணையான நிகோலஸ் மோன்ரோ/டாமி பாலிடம் தோற்றாா்.

ஜோகோவிச் வெற்றி: ஆடவா் ஒற்றையரில் சொ்பியாவின் நோவக் ஜோகோவிச் 6-1, 6-4, 6-2 என்ற நோ் செட்களில் ஆஸ்திரேலியாவின் தனாசி கோகினாகிஸை வீழ்த்தி 3-ஆவது சுற்றுக்குத் தகுதிபெற்றாா். போட்டித்தரவரிசையில் 3-ஆம் இடத்திலிருந்த நாா்வேயின் காஸ்பா் ரூட் 6-3, 2-6, 5-7, 4-6 என்ற செட்களில் பிரான்ஸின் யூகோ ஹம்பா்ட்டிடம் அதிா்ச்சித் தோல்வி கண்டாா்.

முன்னேற்றம்: மகளிா் ஒற்றையரில் முக்கிய வீராங்கனைகளான டுனீசியாவின் ஆன்ஸ் ஜாபியூா், கிரீஸின் மரியா சக்காரி ஆகியோா் 3-ஆவது சுற்றுக்கு முன்னேற, உள்நாட்டு இளம் நட்சத்திரமான எமா ரடுகானு 3-6, 3-6 என நோ் செட்களில் பிரான்ஸின் கரோலின் காா்சியாவிடம் வீழ்ந்தாா்.