6 நாள்களில் சிஎஸ்கேவுடன் மோதல்: என்ன சொல்கிறார் கேகேஆர் புதிய கேப்டன்?

எந்தவொரு நிலையிலும் பேட்டிங் செய்யத் தயாராக இருப்பதாக கொல்கத்தா நைட் ரைடர்ஸ் கேப்டன் ஷ்ரேயஸ் ஐயர் தெரிவித்துள்ளார்.

ஐபிஎல் மெகா ஏலத்தில் கொல்கத்தா நைட் ரைடர்ஸ் அணியால் ரூ. 12.25 கோடிக்குத் தேர்வு செய்யப்பட்டார் ஷ்ரேயஸ் ஐயர். அவரே கொல்கத்தா அணியின் புதிய கேப்டனாக நியமிக்கப்பட்டார்.

அணி நிர்வாகம் வெளியிட்ட விடியோவில் ஷ்ரேயஸ் பேசியதாவது:

"விக்கெட் விழாதவாறு பாட்னர்ஷிப்புக்கு ஒத்துழைப்பு தந்து விளையாடுபவராக நினைத்துக்கொள்ள முடியாது. சூழலுக்கு ஏற்ப நான் அதிரடி ஆட்டக்காரராக இருக்கலாம், மற்றொரு வீரர் விக்கெட் விழாதவாறு பார்த்துக்கொண்டு விளையாடலாம். நிலைமைக்கு ஏற்ப சூழலும் பொறுப்பும் வேறுபடும். விக்கெட் விழாதவாறு பார்த்துக்கொண்டு விளையாட ஒரு வீரரை மட்டுமே நம்ப முடியாது.

இதையும் படிக்க | மகளிர் உலகக் கோப்பை: நியூசிலாந்துக்கு எதிராக இங்கிலாந்து 'த்ரில்' வெற்றி

அணியிலுள்ள அனைத்து வீரர்களும் பொறுப்பேற்றுக்கொண்டு, மற்ற வீரர்களை சார்ந்து இல்லாமல் அணிக்கு வெற்றியைத் தேடித் தர வேண்டும். தனிப்பட்ட முறையில் எனக்கு 3-வது நிலை வீரராகக் களமிறங்குவது பிடிக்கும். நீண்ட நாள்களாக அந்த நிலையில் விளையாடி வருகிறேன். ஆனால், அணி என்னை எங்கு களமிறங்க வேண்டும் என நினைக்கிறதோ அதற்கேற்ப நான் மாறிக்கொள்வேன். 

கொல்கத்தா அணி எப்போதுமே ஆக்ரோஷமான பயத்தைக் காட்டிராத அணியாகத்தான் இருந்துள்ளது. முதல் பந்திலிருந்து அடித்து விளையாடி எதிரணியை பின்னடைவைச் சந்திக்கச் செய்யும். அதற்கான மனநிலை இருக்க வேண்டும். எப்போது பேட்டிங் செய்ய களமிறங்கினாலும், அதே மனநிலையில்தான் நான் செல்வேன். கேப்டனாக வழிநடத்தும்போது அணி வீரர்களிடமிருந்தும் அதைத்தான் நான் விரும்புவேன். 

எது செய்தாலும், அதை அணிக்காக செய்ய வேண்டும். நம்மை முன்னிலைப்படுத்தக் கூடாது. ஒரு கேப்டனாக அந்த மனநிலையில் கவனம் செலுத்தவே நான் விரும்புகிறேன்" என்றார் அவர்.

ஐபிஎல் முதல் ஆட்டத்தில் சென்னை சூப்பர் கிங்ஸ், கொல்கத்தா நைட் ரைடர்ஸ் அணிகள் வரும் 26-ம் தேதி விளையாடுகின்றன.