டி20 உலகக் கோப்பை: ஜிம்பாப்வே அணியை வீழ்த்தியது நெதர்லாந்து

ஜிம்பாப்வே அணிக்கு எதிரான டி20 உலகக் கோப்பை ஆட்டத்தை 5 விக்கெட் வித்தியாசத்தில் வென்றுள்ளது நெதர்லாந்து. 

அடிலெய்டில் நடைபெற்ற ஆட்டத்தில் டாஸ் வென்ற ஜிம்பாப்வே பேட்டிங்கைத் தேர்வு செய்தது. ஜிம்பாப்வேவுக்கு பவர்பிளே மோசமாக அமைந்தது. 6 ஓவர்களின் முடிவில் 3 விக்கெட் இழப்புக்கு 20 ரன்கள் மட்டுமே எடுத்திருந்தது. இதன்பிறகு சிகந்தர் ராஸாவும் ஷான் வில்லியம்ஸும் பொறுப்புடன் விளையாடினார்கள். 12-வது ஓவரில் 28 ரன்களுக்கு ஆட்டமிழந்தார் வில்லியம்ஸ். இன்றும் சிறப்பாக விளையாடிய சிகந்தர் ராஸா 24 பந்துகளில் 3 சிக்ஸர்கள், 3 பவுண்டரிகளுடன் 40 ரன்கள் எடுத்து ஆட்டமிழந்தார். ஜிம்பாப்வே அணி 19.2 ஓவர்களில் 117 ரன்களுக்கு அனைத்து விக்கெட்டுகளையும் இழந்தது. இரு பேட்டர்களைத் தவிர மற்ற அனைவரும் ஒற்றை இலக்க ரன்களுக்கு ஆட்டமிழந்தார்கள். பால் வான் மீகரன் 3 விக்கெட்டுகளை வீழ்த்தினார்.

சிறப்பாகப் பந்துவீசிய நெதர்லாந்து பேட்டிங்கிலும் திறமையை வெளிப்படுத்தியது. மேக்ஸ் ஓ தவுத் 52 ரன்களும் டாம் கூப்பர் 32 ரன்களும் எடுத்து வெற்றிக்குப் பெரிதும் உதவினார்கள். 18 ஓவர்களில் 5 விக்கெட் இழப்புக்கு 120 ரன்கள் எடுத்து வெற்றி பெற்றது நெதர்லாந்து.