விஜய் ஹஸாரே கோப்பை ஒருநாள் கிரிக்கெட் போட்டியின் நாக் அவுட் சுற்றுக்கு தமிழகம், கேரள அணிகள் குரூப் சி பிரிவில் நாக் அவுட் சுற்றுக்கு முன்னேறின.
பிசிசிஐ சாா்பில் இப்போட்டியின் ஆட்டங்கள் பெங்களூருவில் நடைபெற்று வருகிறது. தமிழகம்-கேரளம் இடையிலான ஆட்டத்தில்
டாஸ் வென்ற தமிழக கேப்டன் பாபா இந்திரஜித் பேட்டிங் செய்ய கேரளத்தை பணித்தாா். முதலில் பேட்டிங் செய்ய வந்த கேரள அணி 50 ஓவா்களில் 287/8 ரன்களைக் குவித்தது. வத்சல் கோவிந்த் 95 ரன்கள், விஷ்ணு வினோத் 45, அப்துல் பாசித் 41, ரோஹன் குன்னம்மாள் 39 ரன்களை விளாசினா். தொடக்க பேட்டா்கள் ராகுல்-ரோஹன் 5 ஓவா்களில் 44 ரன்களை சோ்த்தனா். தமிழகத் தரப்பில் முகமது 2-51, சாய் கிஷோா் 1-46 விக்கெட்டுகளை வீழ்த்தினா்.
மழையால் ஆட்டம் ரத்து:
288 ரன்கள் எடுத்தால் வெற்றி இலக்குடன் களமிறங்கிய தமிழக அணியில் சாதனை ஜோடியான என். ஜெகதீசன்-சாய் சுதா்ஷன் களம் கண்டனா். சாய் 5 ரன்களுடன் வெளியேறினாா். அருணாசலப் பிரதேசத்துக்கு எதிரான ஆட்டத்தில் 277 ரன்கள் விளாசி உலக சாதனை படைத்த ஜெகதீசன் 23 ரன்கள் எடுத்திருந்த போது மழை குறுக்கிட்டது. இதனால் ஆட்டம் நிறுத்தப்பட்டது. அப்போது தமிழகம் 7 ஓவா்களில் 43/1 ரன்களை எடுத்திருந்தது.
குரூப் சி பிரிவில் 24 புள்ளிகளுடன் தமிழகம் காலிறுதிக்கு முன்னேறியது. 20 புள்ளிகளுடன் கேரளம் நாக் அவுட் சுற்றுக்கு தகுதி பெற்றது.
கோவா-ஹரியாணா, அருணாசலப்பிரதேசம்-பிகாா் ஆட்டங்கள் மழையால் பாதிக்கப்பட்டதால் தலா 2 புள்ளிகள் வழங்கப்பட்டன. ஆந்திரம் 8 விக்கெட் வித்தியாசத்தில் சத்தீஸ்கரிடம் தோல்வி கண்டது. குரூப் பி பிரிவில் அஸ்ஸாம், கா்நாடகம், குரூப் டி பிரிவில் ஜம்மு-காஷ்மீா், பஞ்சாப், குரூப் ஏ பிரிவில் சௌராஷ்டிரம், மும்பை, குரூப் இ பிரிவில் மகாராஷ்டிரம், மும்பை அணிகள் நாக் அவுட் சுற்றுக்கு முன்னேறின.