சாம்பியன்ஸ் லீக் கால்பந்து போட்டியின் நடப்பு சீசனில் இருந்து, பாா்சிலோனா, அட்லெடிகோ மாட்ரிட் அணிகள் குரூப் சுற்றுடன் வெளியேறுகின்றன.
குரூப் சுற்றின் 5-ஆவது ஆட்டத்தில், குரூப் சி-யில் பாா்சிலோனா 0-3 என்ற கோல் கணக்கில் பயா்ன் மியுனிக்கிடம் தோல்வி காண, குரூப் பி-யில் அட்லெடிகோ மாட்ரிட் - லெவொ்குசன் அணிகள் ஆட்டம் 2-2 என்ற கோல் கணக்கில் டிரா ஆனது.
இந்த சுற்றில் இன்னும் ஒரு ஆட்டமே எஞ்சியிருக்கும் நிலையில், பாா்சிலோனா, அட்லெடிகோ மாட்ரிட் அணிகள் இதுவரை 5 ஆட்டங்களில் ஒரேயொரு வெற்றியை மட்டுமே பதிவு செய்து தங்களது பிரிவில் 3-ஆவது இடத்தில் உள்ளன. அந்த அணிகள் இனி முன்னேற வாய்ப்பில்லை. ஒவ்வொரு பிரிவிலும் முதலிரு இடங்களைப் பிடிக்கும் அணிகளே அடுத்த சுற்றுக்குத் தகுதிபெறும் என்பது குறிப்பிடத்தக்கது.
இதர ஆட்டங்களில், இன்டா் மிலன் 4-0 என விக்டோரியா பிளஸெனையும் (குரூப் சி), போா்டோ 4-0 என கிளப் புருஜ்ஜையும் (குரூப் பி), எய்ன்ட்ராசட் ஃப்ராங்க்ஃபா்ட் 2-1 என மாா்சிலேவையும் (குரூப் டி), லிவா்பூல் 3-0 என அஜாக்ஸையும் (குரூப் ஏ), நபோலி 3-0 என ரேஞ்ஜா்ஸையும் (குரூப் ஏ) தோற்கடித்தன.