மேற்கிந்தியத் தீவுகளுக்கு எதிரான டெஸ்ட் தொடருக்கு இங்கிலாந்து அணியின் இடைக்காலப் பயிற்சியாளராக பால் காலிங்க்வுட் நியமிக்கப்பட்டுள்ளார்.
ஆஷஸ் டெஸ்ட் தொடரில் இங்கிலாந்து அணி படுதோல்வியடைந்ததையடுத்து, தலைமைப் பயிற்சியாளர் பொறுப்பிலிருந்து கிறிஸ் சில்வர்வுட் கடந்த வாரம் நீக்கப்பட்டார். இந்த நிலையில், அணியின் துணைப் பயிற்சியாளர் பால் காலிங்க்வுட் மேற்கிந்தியத் தீவுகளுக்கான டெஸ்ட் தொடருக்கு அணியின் இடைக்காலப் பயிற்சியாளராக நியமிக்கப்பட்டுள்ளார்.
கடந்த மாதம் மேற்கிந்தியத் தீவுகளுக்கு எதிரான டி20 தொடரில் அணியின் பயிற்சியாளராக செயல்பட்ட காலிங்க்வுட், தற்போது பார்படாஸில் ஓய்வில் உள்ளார். பிப்ரவரி 25-ம் தேதி வீரர்கள் ஆண்டிகுவா வரும்போது அவர்களுடன் காலிங்க்வுட் இணையவுள்ளார்.
டெஸ்ட் தொடருக்கான இங்கிலாந்து அணி இந்த வாரத்தில் அறிவிக்கப்படவுள்ளது. முதல் டெஸ்ட் ஆட்டம் ஆண்டிகுவாவில் மார்ச் 1-ம் தேதி தொடங்குகிறது.
பால் காலிங்க்வுட் இங்கிலாந்து அணிக்காக 68 டெஸ்ட், 197 ஒருநாள் மற்றும் 36 டி20 ஆட்டங்களில் விளையாடியுள்ளார்.