தனது குடும்பத்துக்காக வீடு ஒன்று வாங்க வேண்டும் என விதர்பாவைச் சேர்ந்த கிரிக்கெட் வீரரான ஷுபம் துபே தெரிவித்துள்ளார்.
அடுத்த ஆண்டு நடைபெறவுள்ள ஐபிஎல் போட்டிகளுக்கான ஏலம் அண்மையில் நடைபெற்றது. இந்த ஐபிஎல் ஏலத்தில் அனைத்து அணிகளும் தங்களுக்குத் தேவையான வீரர்களை போட்டி போட்டு ஏலத்தில் எடுத்தனர். விதர்பாவைச் சேர்ந்த ஷுபம் துபேவை ராஜஸ்தான் ராயல்ஸ் அணி ரூ.5.60 கோடிக்கு ஏலத்தில் எடுத்தது. சையது முஸ்டாக் அலி கோப்பையில் மிடில் ஆர்டரில் சிறப்பாக விளையாடிய ஷுபம் துபே ஐபிஎல் ஏலத்தில் கவனம் பெற்றார். ஏழ்மையான குடும்பத்தில் பிறந்த ஷுபம் துபே கிரிக்கெட் கிட் வாங்குவதற்கே மிகவும் சிரமப்பட்டுள்ளார்.
இந்த நிலையில், தனது குடும்பத்துக்காக வீடு ஒன்று வாங்க வேண்டும் என ஷுபம் துபே தெரிவித்துள்ளார்.
இது தொடர்பாக ஷுபம் துபே பேசியதாவது: எனது குடும்பத்தினரால் எனக்கு ஒரு கிரிக்கெட் கிட் கூட வாங்கிக் கொடுக்க முடியாத சூழல். எனக்கு கிரிக்கெட் கிட் வாங்கித் தரவேண்டுமென என் தந்தை முயற்சி செய்தும் அவரால் வாங்கிக் கொடுக்க முடியவில்லை. குடும்ப சூழ்நிலைகள் சரியில்லாதபோதிலும் அவர்கள் என்னை கிரிக்கெட் விளையாடக் கூடாது என ஒருபோதும் வற்புறுத்தியது கிடையாது.
என் தந்தை சிறிய வேலைகள் செய்து குடும்பத்துக்கு வருமானம் ஈட்டுகிறார். எனது சகோதரன் குடும்பத்தின் தேவைகளை கவனித்துக் கொள்கிறான். எனக்கு காயங்கள் ஏற்படும்போது, எனது குடும்ப உறுப்பினர்கள் நேர்மறையான சிந்தனையோடு முன்னேறிச் செல்லுமாறு கூறுவார்கள். அவர்களுக்கு நல்ல வாழ்க்கையை ஏற்படுத்தித் தர விரும்புகிறேன். முதலில் எனது குடும்பத்துக்காக ஒரு வீடு வாங்க ஆசைப்படுகிறேன் என்றார்.