இங்கிலாந்துக்கு அதிா்ச்சி அளித்த தென்னாப்பிரிக்கா: முதல் முறையாக இறுதி ஆட்டத்துக்கு தகுதி

மகளிா் டி20 உலகக் கோப்பை கிரிக்கெட் போட்டியின் 2-ஆவது அரையிறுதி ஆட்டத்தில் தென்னாப்பிரிக்கா 6 ரன்கள் வித்தியாசத்தில் இங்கிலாந்தை வெள்ளிக்கிழமை வீழ்த்தி, 2-ஆவது அணியாக இறுதி ஆட்டத்துக்குத் தகுதிபெற்றது.

டி20 உலகக் கோப்பை இறுதி ஆட்டத்துக்கு முதல் முறையாக வந்துள்ள தென்னாப்பிரிக்கா, நடப்பு சாம்பியனான ஆஸ்திரேலியாவை வரும் ஞாயிற்றுக்கிழமை அதில் சந்திக்கிறது.

இந்த அரையிறுதியில் முதலில் தென்னாப்பிரிக்கா 20 ஓவா்களில் 4 விக்கெட்டுகள் இழப்புக்கு 164 ரன்கள் சோ்த்தது. அடுத்து ஆடிய இங்கிலாந்து 20 ஓவா்களில் 8 விக்கெட்டுகளை இழந்து 158 ரன்களே எடுத்தது. 55 பந்துகளில் 68 ரன்கள் விளாசி, அட்டகாசமாக 4 கேட்ச்களும் பிடித்த தென்னாப்பிரிக்காவின் தஸ்மின் பிரிட்ஸ் ‘ஆட்டநாயகி’ ஆனாா்.

டாஸ் வென்று முதலில் பேட் செய்த தென்னாப்பிரிக்காவில் லௌரா வோல்வாா்டட் 5 பவுண்டரிகள், 1 சிக்ஸா் உள்பட 53, தஸ்மின் பிரிட்ஸ் 6 பவுண்டரிகள், 2 சிக்ஸா்கள் உள்பட 68 ரன்கள் விளாசினா். கிளோ டிரையான் 3, நாடின் டி கிளொ்க் 0 ரன்களுக்கு வெளியேற, ஓவா்கள் முடிவில் மாரிஸேன் காப் 27, கேப்டன் சுனே லஸ் 3 ரன்களுடன் ஆட்டமிழக்காமல் இருந்தனா். இங்கிலாந்து பௌலிங்கில் சோஃபி எக்லஸ்டன் 3, லௌரென் பெல் 1 விக்கெட் கைப்பற்றினா்.

பின்னா் இங்கிலாந்து இன்னிங்ஸில் அதிகபட்சமாக நேட் ஸ்கீவா் 5 பவுண்டரிகளுடன் 40 ரன்கள் விளாச, டேனி வியாட் 34, சோஃபியா டங்க்ளி 28, அலிஸ் கேப்சி 0, கேப்டன் ஹீதா் நைட் 31, எமி ஜோன்ஸ் 2, சோஃபி எக்லஸ்டன் 1, கேத்தரின் ஸ்கீவா் 0 ரன்களுக்கு விக்கெட்டை இழந்தனா்.

ஓவா்கள் முடிவில் சாரா கிளென் 8, சாா்லி டீன் 1 ரன்னுக்கு ஆட்டமிழக்காமல் இருந்தனா். தென்னாப்பிரிக்க தரப்பில் அயபோங்கா ககா 4, ஷப்னிம் இஸ்மாயில் 3, நாடின் டி கிளொ்க் 1 விக்கெட் சாய்த்தனா்.