பும்ரா, அஸ்வினைப் பின்னுக்குத் தள்ளி அக்‌ஷர் படேல் நிகழ்த்திய சாதனை!

டெஸ்ட் கிரிக்கெட்டில் குறைந்த பந்துகளில் 50 விக்கெட்டுகளை எடுத்த இந்தியப் பந்துவீச்சாளர் என்கிற சாதனையைப் படைத்துள்ளார் ஆல்ரவுண்டர் அக்‌ஷர் படேல்.

ஆஸ்திரேலியாவுக்கு எதிரான டெஸ்ட் தொடரில் 2-1 என முன்னிலை வகிக்கிறது இந்திய அணி. இந்தூரில் நடைபெற்ற 3-வது டெஸ்டை ஆஸ்திரேலியா வென்றது. 4-வது டெஸ்ட் ஆமதாபாத்தில் வியாழன் அன்று தொடங்கியது. 

ஆஸ்திரேலிய அணி முதல் இன்னிங்ஸில் 167.2 ஓவர்களில் 480 ரன்கள் எடுத்தது. கவாஜா 180, கிரீன் 114 ரன்கள் எடுத்தார்கள். அஸ்வின் 6 விக்கெட்டுகளை வீழ்த்தினார். இந்திய அணி முதல் இன்னிங்ஸில் 571 ரன்கள் எடுத்தது. விராட் கோலி 186, ஷுப்மன் கில் 128 அக்‌ஷர் படேல் 79 ரன்கள் எடுத்தார்கள். ஆஸ்திரேலிய அணி 2-வது இன்னிங்ஸை இன்றும் தொடர்கிறது.

இன்று சிறப்பாக விளையாடிய டிராவிஸ் ஹெட், 90 ரன்கள் எடுத்த நிலையில் அக்‌ஷர் படேல் பந்தில் போல்ட் ஆனார். டெஸ்ட் கிரிக்கெட்டில் அக்‌ஷர் படேலின் 50-வது விக்கெட் இது. 12-வது டெஸ்டில் இது சாத்தியமாகியுள்ளது. அஸ்வின் 9 டெஸ்டுகளில் 50 விக்கெட்டுகள் எடுத்துள்ளார். 

எனினும் டெஸ்ட் கிரிக்கெட்டில் குறைந்த பந்துகளில் 50 விக்கெட்டுகள் எடுத்த இந்தியப் பந்துவீச்சாளர் என்கிற பெருமையை அக்‌ஷர் படேல் அடைந்துள்ளார். 2205 பந்துகளில் இந்த இலக்கை அவர் எட்டியுள்ளார். மேலும் மோடி மைதானத்தில் 3 டெஸ்டுகளில் இதுவரை 22 விக்கெட்டுகளை எடுத்துள்ளார். 

குறைந்த பந்துகளில் 50 டெஸ்ட் விக்கெட்டுகள்: இந்தியப் பந்துவீச்சாளர்கள்

அக்‌ஷர் படேல் - 2205 பந்துகள் 
பும்ரா - 2465 பந்துகள்
கர்சன் காவ்ரி - 2534 பந்துகள் 
அஸ்வின் - 2597 பந்துகள்