ஹைதராபாதுக்கு ஹாட்ரிக் வெற்றி; பெங்களூரு போராடி தோல்வி

பெங்களூரு: ஐபிஎல் போட்டியில் சன்ரைசா்ஸ் ஹைதராபாத் 25 ரன்கள் வித்தியாசத்தில் ராயல் சேலஞ்சா்ஸ் பெங்களூரை திங்கள்கிழமை வீழ்த்தியது.

முதலில் ஹைதராபாத் 20 ஓவா்களில் 3 விக்கெட்டுகள் இழப்புக்கு 287 ரன்கள் சோ்க்க, பெங்களூரு 20 ஓவா்களில் 7 விக்கெட்டுகளை இழந்து 262 ரன்களே எடுத்தது.

ஹைதராபாதுக்கு ‘ஹாட்ரிக்’ வெற்றியாகவும், பெங்களூருக்கு தொடா்ந்து 5-ஆவது தோல்வியாகவும் இந்த ஆட்டம் இருந்தது.

முன்னதாக டாஸ் வென்ற பெங்களூரு, பந்துவீச்சை தோ்வு செய்தது. ஹைதராபாத் இன்னிங்ஸில் அபிஷேக் 2 பவுண்டரிகள், 2 சிக்ஸா்களுடன் 34 ரன்களுக்கு வெளியேறினாா். அடுத்து வந்த ஹென்ரிக் கிளாசென், ஹெட்டுடன் கை கோக்க, அந்த பாா்ட்னா்ஷிப் பெங்களூரு பௌலிங்கை முற்றிலுமாக சிதைத்தது.

ஹெட் 41 பந்துகளில் 9 பவுண்டரிகள், 8 சிக்ஸா்கள் உள்பட 102 ரன்களுக்கு ஆட்டமிழந்தாா். 4-ஆவது பேட்டராக எய்டன் மாா்க்ரம் களம் புக, கிளாசென் 31 பந்துகளில் 2 பவுண்டரிகள், 7 சிக்ஸா்களுடன் 67 ரன்களுக்கு விக்கெட்டை இழந்தாா்.

அடுத்து விளையாட வந்தாா் அப்துல் சமத். ஓவா்கள் முடிவில் மாா்க்ரம் 17 பந்துகளில் 2 பவுண்டரிகள், 2 சிக்ஸா்களுடன் 32, சமத் 10 பந்துகளில் 4 பவுண்டரிகள், 3 சிக்ஸா்களுடன் 37 ரன்களுக்கு ஆட்டமிழக்காமல் இருந்தனா். பெங்களூரு தரப்பில் லாக்கி ஃபொ்குசன் 2, ரீஸ் டாப்லி 1 விக்கெட் கைப்பற்றினா்.

பின்னா் 288 ரன்களை இலக்காகக் கொண்டு விளையாடிய பெங்களூரில் விராட் கோலி 20 பந்துகளில் 6 பவுண்டரிகள், 2 சிக்ஸா்களுடன் 42 ரன்கள் சோ்க்க, கேப்டன் பிளெஸ்ஸிஸ் 28 பந்துகளில் 7 பவுண்டரிகள், 4 சிக்ஸா்களுடன் 62 ரன்கள் விளாசினாா்.

எனினும், வில் ஜாக்ஸ் 7, ரஜத் பட்டிதாா் 9, சௌரவ் சௌஹான் 0, மஹிபால் லோம்ரோா் 19 ரன்களுக்கு வீழ்ந்தனா். தினேஷ் காா்த்திக் வழக்கம்போல் கடைசி ஆா்டரில் தனியொருவராக போராடி 35 பந்துகளில் 5 பவுண்டரிகள், 7 சிக்ஸா்களுடன் 83 ரன்கள் விளாசி வீழ்ந்தாா். நடப்பு சீசனில் மிக தூரமான சிக்ஸரை (108 மீட்டா்) விளாசி அவா் சாதனை படைத்தாா்.

ஓவா்கள் முடிவில் அனுஜ் ராவத் 25, விஜய்குமாா் வைஷாக் 1 ரன்னுடன் ஆட்டமிழக்காமல் இருந்தனா். ஹைதராபாத் தரப்பில் கேப்டன் பேட் கம்மின்ஸ் 3, மயங்க் மாா்கண்டே 2, நடராஜன் 1 விக்கெட் சாய்த்தனா்.

287/3

இந்த ஆட்டத்தில் ஹைதராபாத் விளாசிய ரன்களே (287/3), ஐபிஎல் வரலாற்றில் ஒரு அணியின் அதிகபட்ச ஸ்கோராகும். இதற்கு முன், நடப்பு சீசனில் இதே ஹைதராபாத் அணி, கடந்த மாதம் 27-ஆம் தேதி மும்பைக்கு எதிராக 3 விக்கெட்டுகள் இழப்புக்கு 277 ரன்கள் சோ்த்ததே அதிகபட்சமாக இருந்தது.

549

ஹைதராபாத் (287), பெங்களூரு (262) மொத்தமாக சோ்த்த 549 ரன்களே, ஐபிஎல் மற்றும் சா்வதேச டி20 வரலாற்றில் ஒரு ஆட்டத்தில் அடிக்கப்பட்ட அதிகபட்ச மொத்த ஸ்கோராகும். இதற்கு முன், இதே சீசனில் மும்பை, ஹைதராபாத் அணிகள் இணைந்து 523 ரன்கள் சோ்த்தது அதிகபட்சமாக இருந்தது.

81

இந்த ஆட்டத்தில் இரு அணிகளுமாக சோ்ந்து 81 பந்துகளை பவுண்டரிக்கோ, அதைக் கடந்து சிக்ஸராகவோ விரட்டியுள்ளன (43 பவுண்டரிகள், 38 சிக்ஸா்கள்). ஐபிஎல் மற்றும் சா்வதேச டி20-இல் இதுவே ஒரு ஆட்டத்தில் அதிகபட்ச எண்ணிக்கையாகும். இதே எண்ணிக்கையை மேற்கிந்தியத் தீவுகள் - தென்னாப்பிரிக்கா கடந்த 2023-இல் எட்டியுள்ளன.

38

இரு அணிகளுமாக இந்த ஆட்டத்தில் 38 சிக்ஸா்கள் விளாசியுள்ளன. இதுவே ஒரு டி20 ஆட்டத்தில் அதிகபட்சமாகும். நடப்பு சீசனில் மும்பை - ஹைதராபாத் ஆட்டத்திலும் இதே எண்ணிக்கை எட்டப்பட்டது.