சதம் விளாசிய அபிஷேக் சர்மா; ஜிம்பாப்வேவுக்கு 235 ரன்கள் இலக்கு!

ஜிம்பாப்வேவுக்கு எதிரான 2-வது டி20 போட்டியில் முதலில் பேட் செய்த இந்திய அணி 2 விக்கெட்டுகளை இழந்து 234 ரன்கள் குவித்துள்ளது.

இந்தியா மற்றும் ஜிம்பாப்வே அணிகளுக்கு இடையிலான 2-வது டி20 போட்டி ஹராரே ஸ்போர்ட்ஸ் கிளப் மைதானத்தில் இன்று (ஜூலை 7) நடைபெற்று வருகிறது. இந்தப் போட்டியில் டாஸ் வென்ற இந்திய அணி பேட்டிங்கைத் தேர்வு செய்து முதலில் விளையாடியது.

இந்திய அணியில் தொடக்க ஆட்டக்காரர்களாக ஷுப்மன் கில் மற்றும் அபிஷேக் சர்மா களமிறங்கினர். கேப்டன் ஷுப்மன் கில் 2 ரன்களில் ஆட்டமிழந்து அதிர்ச்சியளித்தார். அதன்பின், அபிஷேக் சர்மா மற்றும் ருதுராஜ் கெய்க்வாட் ஜோடி சேர்ந்தனர். அறிமுகப் போட்டியில் ரன் எடுக்காமல் ஆட்டமிழந்த அபிஷேக் சர்மா இன்றையப் போட்டியில் களமிறங்கியது முதலே அதிரடியில் மிரட்டினார். அபிஷேக் சர்மா அதிரடியாக விளையாடி சிக்ஸர்களை பறக்கவிட, ருதுராஜ் கெய்க்வாட் நிதான ஆட்டத்தை வெளிப்படுத்தினார்.

அதிரடியாக விளையாடிய அபிஷேக் சர்மா 46 பந்துகளில் சதம் விளாசி அசத்தினார். அவர் 47 பந்துகளில் 100 ரன்கள் எடுத்து ஆட்டமிழந்தார். அதில் 7 பவுண்டரிகள் மற்றும் 8 சிக்ஸர்கள் அடங்கும். அதன்பின், ருதுராஜுடன் ரிங்கு சிங் ஜோடி சேர்ந்தார். அரைசதம் எடுக்கும் வரை நிதானம் காட்டிய ருதுராஜ், அதன்பின் அதிரடியாக விளையாடி ரன்கள் சேர்த்தார். களமிறங்கியது முதலே அதிரடி ஆட்டத்தை வெளிப்படுத்திய ரிங்கு சிங் சிக்ஸர்களை பறக்கவிட்டார்.

இறுதியில் நிர்ணயிக்கப்பட்ட 20 ஓவர்களின் முடிவில் இந்திய அணி 2 விக்கெட்டுகளை இழந்து 234 ரன்கள் எடுத்துள்ளது. ருதுராஜ் கெய்க்வாட் 47 பந்துகளில் 77 ரன்கள் (11 பவுண்டரிகள் மற்றும் ஒரு சிக்ஸர்) எடுத்தும், ரிங்கு சிங் 22 பந்துகளில் 48 ரன்கள் (2 பவுண்டரிகள் மற்றும் 5 சிக்ஸர்கள்) எடுத்தும் களத்தில் இருந்தனர்.

235 ரன்கள் எடுத்தால் வெற்றி என்ற கடினமான இலக்கை நோக்கி ஜிம்பாப்வே அணி விளையாடி வருகிறது.