புரோ லீக் ஹாக்கி: இந்தியா தோல்வி

சா்வதேச ஹாக்கி சம்மேளனத்தின் புரோ லீக் ஹாக்கி போட்டியில், இந்திய ஆடவா் அணி 2-3 கோல் கணக்கில் நெதா்லாந்திடம் திங்கள்கிழமை தோல்வி கண்டது.

இதே நெதா்லாந்துக்கு எதிராக 1-2 கோல் கணக்கில் கடந்த சனிக்கிழமை தோல்வி கண்ட இந்தியாவுக்கு, இது 2-ஆவது தோல்வியாகும்.

இந்த ஆட்டத்தில் முதலில், இந்தியாவுக்காக 100-ஆவது ஆட்டத்தில் விளையாடும் அபிஷேக் 20-ஆவது நிமிஷத்தில் கோல் அடித்தாா். அதற்கு பதில் தரும் விதமாக, நெதா்லாந்தின் திஜஸ் வான் டாம் 24-ஆவது நிமிஷத்தில் ஸ்கோா் செய்தாா். இதனால் முதல் பாதி ஆட்டம் 1-1 என சமநிலையில் முடிந்தது.

2-ஆவது பாதியில் ஜெப் ஹோடெமேகா்ஸ் 33-ஆவது நிமிஷத்தில் கோலடிக்க, நெதா்லாந்து 2-1 என முன்னேறியது. விட்டுக்கொடுக்காத இந்திய தரப்பில், 54-ஆவது நிமிஷத்தில் கிடைத்த பெனால்ட்டி காா்னா் வாய்ப்பில் ஜக்ராஜ் சிங் ஸ்கோா் செய்ய, ஆட்டம் 2-2 என மீண்டும் சமநிலை கண்டு விறுவிறுப்பானது.

பரபரப்பான இறுதிக் கட்டத்தில் ஜிப் ஜான்சென் 57-ஆவது நிமிஷத்தில் அடித்த கோலால், நெதா்லாந்து முன்னிலை பெற்றது. எஞ்சிய நேரத்தில் இந்தியாவின் கோல் முயற்சிகளுக்கு பலன் கிடைக்காமல் போக, இறுதியில் நெதா்லாந்து 3-2 என்ற கணக்கில் வென்றது. இந்தியா அடுத்த ஆட்டத்தில், ஆா்ஜென்டீனாவை புதன்கிழமை சந்திக்கிறது.