டி20 உலகக் கோப்பைப் போட்டிக்கான மேற்கிந்தியத் தீவுகள் அணியில் முன்னாள் டெஸ்ட் கேப்டன் ஜேசன் ஹோல்டர் சேர்க்கப்பட்டுள்ளார்.
இங்கிலாந்துக்கு எதிரான முதல் ஆட்டத்தில் விளையாடிய மே.இ. தீவுகள் வேகப்பந்து வீச்சாளர் ஒபெட் மெக்காய், காயம் காரணமாக டி20 உலகக் கோப்பைப் போட்டியிலிருந்து விலகியுள்ளார். இதையடுத்து மாற்று வீரராக அணியில் இருந்த முன்னாள் டெஸ்ட் கேப்டன் ஜேசன் ஹோல்டர், 15 பேர் கொண்ட மே.இ. தீவுகள் அணியில் இணைந்துள்ளார். 29 வயது ஹோல்டர், 27 டி20 ஆட்டங்களில் விளையாடியுள்ளார்.
இங்கிலாந்துக்கு எதிரான முதல் ஆட்டத்தில் 55 ரன்களுக்கு ஆட்டமிழந்து தோல்வியடைந்த மே.இ. தீவுகள் அணி, 2-வது ஆட்டத்தில் தென்னாப்பிரிக்காவிடம் 8 விக்கெட் வித்தியாசத்தில் தோல்வியடைந்துள்ளது.
நாளை பகலில் நடைபெறும் ஆட்டத்தில் வங்கதேச அணியை மேற்கிந்தியத் தீவுகள் அணி எதிர்கொள்கிறது.